AMA shtyn procesin e dixhitalizimit në Tiranë “për një kohë të shkurtër”

Autoriteti i Mediave Audoiovizive ka shtyrë sërish afatin për mbylljen e transmetimeve analoge në qarqet Tiranë dhe Durrës, i parashikuar në 30 qershor 2017.

Sipas AMA shkak për shtyrjen “në një kohë të shkurtër” është sasia e pamjaftueshme në treg e dekoderave tokësorë që mundësojnë marrjen e sinjalit dixhital, krahasuar me numrin e lartë të banorëve në këto qarqe.

AMA ende nuk ka vendosur një afat zyrtar. “Me plotësimin e kushteve të domosdoshme dhe të nevojshme për mbarëvajtjen e procesit të digjitalizimit, AMA do të njoftojë zyrtarisht për afatin e mbylljeve të transmetimeve analoge në qarqet Tiranë e Durrës”, thuhet në njoftim.

Ndërkohë në Berat nga 3 korriku do të fillojë procesi i dixhitalizimit dhe një muaj më vonë transmetimet analoge do të mbyllen.

Njoftimi mbyllet me një thirrje për qytetarët e Beratit që e marrin sinjalin në mënyrë analoge (me antenë), të cilët duhet të pajisen me dekodera DVB-T2, pasi në të kundërt nuk do të mund të shohin transmetime televizive.

/l.k./