Lirohet Osman Kavala në Turqi, për tu arrestuar disa orë më pas

Prej 2 vitesh e gjysmë, sipërmarrësi dhe filantropi turk Osman Kavala qëndronte padrejtësisht i burgosur në Stamboll, për akuzën e nxitjes së protestave për mbrojtjen e parkut Gezi në vitin 2013, ku disa qytetarë mbetën të vrarë e dhjetëra të tjerë u plagosën nga përplasjet me autoritetet policore.

Së bashku me 8 aktivistë të tjerë, Kavala u shpall i pafajshëm nga gjykata e Stambollit, duke surprizuar opinionin publik dhe ndërkombëtarët, ndërsa në sallën e gjyqit shpërthyen duartrokitjet dhe brohoritjet.

Por liria nuk zgjati shumë, pasi disa orë më vonë, një prokuror kërkoi arrestimin e tij për pjesëmarrjen në grushtin e dështuar të shtetit në vitin 2016.

Kavala u shoqërua menjëherë nga forcat policore, duke sjellë një reagim të ashpër ndërkombëtar nga mediat dhe organizatat për mbrojtjen e demokracisë dhe të drejtave të njeriut.

Presidenti turk Erdogan e ka akuzuar Kavalan dhe si bashkëpunëtor me organizatën FETO të Fetullah Gylen, për anatemimin e së cilës Erdogan po përdor të gjithë aparatin e tij shtetëror dhe institucionet e diplomacisë turke.

Duke parë rastet e dënimit për pjesëmarrjen në të ashtuquajturin grusht shteti, aktivistët i frikësohen një dënimi të ashpër pë Kavalan, si pjesë e përpjekjeve shtetërore për heshtjen dhe izolimin e kundërshtarëve të Presidentit turk Erdogan.

Prokuroria në pretencën e saj ka kërkuar burgim përjetë në izolim për Kavalan dhe dënime me 20 vite burgim për bashkëpunëtorët e tij.

Pretendimet e prokurorisë, cilësohen si të pabazuara nga organizatat tē mbrojtjes së të drejtave të njeriut dhe po shihen si një ndërmarrje politike, si kundërpërgjigje ndaj komunitetit ndërkombëtar për kërkesat e shumta për lirimin e Kavalas dhe kundërshtarëve politikë të presidentit Erdogan.