Po negociatave, me të tjera kushte për Shqipërinë

Ditën e sotme Bashkimi Evropian pritet të jap Po-në vendimtare për hapjen e negociatave me Shqipërinë dhe Maqedoninë e Veriut.

Sipas raportimeve të disa mediave të mëdha dhe deklaratave të Ministrit gjerman për Evropën Michael Roth, hapja e negociatave pritet të miratohet në bllok nga 27 vendet anëtare, duke mos hasur kundërshtim nga Franca, Holanda apo të tjera vende skeptike.

Parisi dhe Haga lehtësuan kundërshtimet e tyre muajin e kaluar dhe vendosën për të lejuar fillimin e bisedimeve, megjithë krizën e koronavirusit, me Brukselin të etur për të treguar vendosmërinë e tij për të sjellë Ballkanin në gjirin e BE.

“Unë nuk mendoj se çfarë po ndodh (me koronavirus) do të ndryshojë vendimin e vendeve anëtare,” u tha shefi i politikës së jashtme të BE Josep Borrell para gazetarëve të Reuters të premten. Borrell tha gjithashtu se ai kishte telefonuar Presidentin serb Aleksandar Vuçiç për të siguruar atë për mbështetjen e BE pasi Vuçiç lavdëroi Kinën për ndihmën e saj në luftimin e koronavirusit në Serbi dhe vuri në dyshim solidaritetin evropian.

Mbi situatën e pandemisë së koronavirusit në Ballkan, në një video-konferencë të ministrave të jashtëm të BE të hënën, reagoi dhe Ministri i Jashtëm gjerman Heiko Maas, i cili u kërkoi qeverive evropiane të tregojnë mbështetje për Ballkanin.
“Ne gjithashtu duhet të shohim fqinjët tanë, të tillë si në Ballkanin Perëndimor, vende që janë në prag të fillimit të bisedimeve të pranimit. Atje duhet të forcojmë sistemet më të dobëta shëndetësore … Transmetimi i virusit nuk njeh kufijtë, “u tha ai gazetarëve përmes konferencës video.

Por përpos 8 kushteve të vendosura më parë nga Bundestagu gjerman, ku përfshihet reforma elektorale, vazhdimi i reformës gjyqësore dhe rikthimi i gjykatave në funksionalitet apo luftimi i korrupsionit dhe krimit të organizuar, pritet që ditën e sotme lista e kushteve për Shqipërinë të zgjerohet me të tjera kërkesa të shteteve anëtare.

Greqia pritet të kërkojë vendosmëri nga ana shqiptare për mbrojtjen e të drejtës së pronës te anëtarët e minoritetit grek në Shqipëri, ndërsa nga Holanda pritet të vendoset si kusht ndryshimi i ligjit për mediat (paketa anti-shpifje) sipas rekomandimeve që do vinë nga Komisioni i Venecias. Rekomandimet pritet të jepen në muajin qershor, pas krizës së krijuar javët e fundit me pandeminë e koronavirusit.

Nga ana tjetër Maqedonia e Veriut, pritet të ketë një po pa kushte të një mase të tillë si ato për Shqipërinë, duke i sjellë përparësi në fillimin e negociatave.

Me vetingun e gjyqtarëve në gjysmën e rrugëtimit të tij, por ku ende nuk ka mbaruar shqyrtimi i listës prioritare të gjyqtarëve dhe prokurorëve; me krizën kushtetuese ku ende nuk ka një autoritet që mund të vendosë mbi ligjshmërinë e institucioneve të ndryshme dhe vendimeve të marra nga ana e Parlamentit apo Presidentit dhe me bisedimet e ngrira mes mazhorancës dhe opozitës, PO-ja e Bashkimit Evropian mbetet një vendimi formal, i cili nuk penalizon të paktën Maqedoninë e Veriut në rrugën e saj drejt BE.

Njëkohësisht vendimi i sotëm pritet t’i rikujtojë Shqipërisë se integrimi në BE duhet të shkojë përtej retorikës boshe të politikës, e cila duhej të priste krijimin e një pandemie të rrezikshme për të ngritur flamujt e bardhë e për të pranuar uljen në tryeza diskutimi.

Në orët në vijim pritet dhe vendimi i plotë me listën e kushteve që Shqipëria duhet të përmbushë për nisjen e bisedimeve.

në përditësim.