Në një intervistë të fundit për emisionin “Dita Jonë” në A2 CNN, Ambasadori i Bashkimit Europian në Tiranë, Silvio Gonzato, ndau me publikun një histori personale: “Kam dy fëmijë me ish-gruan, por tani jam martuar me një burrë”.
Diplomati i cili herë pas here ka theksuar mbështetjen e vet ndaj komunitetit LGBT+ në Shqipëri theksoi se, megjithë guximin që kërkon të flasësh hapur për jetën personale, ai zbaton një parim të thjeshtë: “Mënyra si jam unë nuk është kërcënim për ju dhe ndjenjat që kam janë të njëjta me ju”.
Deklarata e Gonzatos nxiti një valë reagimesh në portalet shqiptare dhe në rrjetet sociale. Në Gazeta Express, artikulli me titull “Kam dy fëmijë me ish-gruan” mori qindra komente, ku lexuesit e përgëzonin ambasadorin për sinqeritetin e tij . Një përdorues në Instagram shkroi: “Më mirë të jenë të sinqertë, vetëm kështu fitohet besimi i njerëzve” . Ky reagim pasqyron përkrahjen që gjeti mes qytetarëve që mbështesin hapjen dhe diversitetin.
Nga ana tjetër, në portale si Bota Sot, disa komentues shfaqën rezervat e tyre. “Shqipëria ka çështje më të rëndësishme për të diskutuar,” shkruante një lexues, duke e konsideruar deklaratën e Gonzatos si një ndërhyrje kulturore të panevojshme.
Ky lloj reagimi pasqyron një pjesë të opinionit publik që i kundërvihet çështjeve LGBT, duke e parë orientimin seksual si temë jashtë fokusit të problemeve kombëtare.
Analistë të pavarur theksuan se debati u zhvendos nga orientimi seksual i Gonzatos tek roli i diplomacisë në promovimin e vlerave europiane. Sipas tyre, delegacioni i BE-së ka rritur aktivitetet kulturore nga ekspozita fotografike me temë dashurinë te diskutimet për diversitetin me synimin për të forcuar dialogun dhe për të avancuar axhendën e “bashkuar në diversitet”.
Kjo gjë, sipas analistëve, ka ngjallur rezistencë te ata që e shohin integrimin në Bashkimin Europian si presion për ndryshim të vlerave tradicionale.
Edhe në TikTok dhe Facebook u shpërndanë klipet e intervistës së Gonzatos, ku videoja me fragmentin “Kam dy fëmijë me ish-gruan…” u shndërrua në virale shumë shpejt, duke mbledhur mijëra shikime.
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.