Turqi: Përurohet aeroporti i parë i ndërtuar mbi det në Evropë

­Turqia përuroi sot aeroportin “Ordu­ Giresun”, i cili do të jetë aeroporti i parë i ndërtuar mbi det në Turqi dhe Evropë, ndërsa është i dyti i këtij lloji në botë.

Me fillimin e operimit të tij, numri i aeroporteve turke do të shkojë në 55. Nga ana tjetër, kanë nisur punimet për ndërtimin e aeroporteve lokale në zonat turistike Demre, Kash dhe Finike, në perëndim të Provincës Antalia.

Numri i pasagjerëve të linjave ajrore është rritur në 166,2 milionë në vitin 2014, nga 34 milionë, që ishte në vitin 2002. Kurse aeroportet turke me numrin më të lartë të pasagjerëve janë respektivisht ata “Ataturk” dhe “Sabiha Gokçen” të Stambollit, aeroporti i Antalias, “Esenboga” i Ankarasë, “Adnan Menderes” i Izmirit dhe aeroporti i Adanasë.

Gjatë kësaj periudhe, numri i destinacioneve, që kompanitë ajrore turke realizojnë jashtë shtetit, është rritur nga 60 në 237; numri i pasagjerëve të linjave domestike është rritur nga 20,5 milionë në 85,4 milionë, ndërsa numri i pasagjerëve të linjave ndërkombëtare është rritur nga 35 milionë në 80,3 milionë.