Publikimi i akt-akuzës së Gjykatës Speciale të Kosovës që numëron mbi 100 krime lufte nga ana e Presidentit aktual të Kosovës Hashim Thaçi, ish-kryetarit të Kuvendit të Kosovës Kadri Veseli dhe dhjetërave figurave të tjera drejtuese të Ushtrisë Clirimtare të Kosovës, duket se ka bërë bashkë politikën në Shqipëri e Kosovë për të mbrojtur kauzën e UCK dhe liderët e saj, pa asnjë dallim të ngjyrimeve politike.
Po kur vjen puna te të rinjtë shqiptar në Kosovë e në Shqipëri, si e gjykojnë atë debatin e hetimit të krimeve të luftës së kryera nga ana e UCK?
Historia Ime mblodhi disa ndjesi të para nga 5 të rinj nga Shqipëria dhe Kosova, fill pas publikimit të akt-akuzës për krime lufte nga ana e Gjykatës Speciale.
Interesante është se si midis të rinjve, publikimi i akt-akuzës shihet më tepër si lëvizje politike e ndërmarrë në prag të bisedimeve të planifikuara në Uashington për normalizimin e marrëdhënieve Kosovë-Serbi.
“Momenti i publikimit të aktakuzës nga Zyra e Prokurorit të Specializuar, sidomos tash në kohën kur pritej një takim që shpesh edhe quhej historik në Shtëpinë e Bardhë e ku thuhej që prezent do të ishte edhe Presidenti i SHBA-ve, Donald Trump, jo veç që ishte jashtëzakonisht befasues, por menjëherë ngriti edhe dyshime për qëllimin e publikimit të saj, sidomos derisa ajo ende nuk është e konfirmuar nga Gjykata Speciale. Mendimi i parë ishte që po bëhet një komplot ndaj përpjekjeve të SHBA-ve për të finalizuar marrëveshjen.” deklaroi Halil Berisha nga Prishtina për vendimin.
Mundësitë për “komplot nga jashtë” Halili nuk i konsideron më si të mirëqena, por edhe “..nëse ekziston ndonjë mundësi për komplot, e që dyshoj në këtë gjë, adresë nuk mund të jetë Evropa.”, tha ai. Sipas të riut nga Prishtina, publikimi i akt-akuzës lidhet më tepër me përpjekjet për shpërbërjen e saj, për të cilat mund të diskutohej dhe në Uashington.
Si të qëllimtë e sheh publikimin e vendimit dhe Frenkli Prengaj, një i ri nga Tirana, duke e lidhur atë me takimin e shumëpritur në Uashington e duke shtuar se: “.. Nuk e di nëse kane kryer vrasje të rëndomta apo politike, ama di që UCK nuk ka kryer krime kundër njerëzimit, por iu pergjigj dhunës dhe vrasjeve sistematike, si do i përgjigjej cdo popull tjetër. Prandaj nuk mundet kurresesi te relativizohen krimet kunder shqiptarëve të Kosovës me akuza te tilla.”
Por nuk duhet mohuar se akuzat e ngritura ndaj Thacit dhe Veselit, dy figura ende dominante në jetën politike në Kosovë 20 vite pas luftës, kanë ngjallur dhe kënaqësi, duke e parë si vënie të drejtësisë në vend, jo vetëm për periudhën e luftës, por dhe për gabimet e tyre në qeverisjen e pas-luftës në Kosovë dhe si mundësia më e mirë për t’i larguar nga jeta politike e vendit.
Agoni, i lindur fill pas përfundimit të luftës thotë se: ” ..kur e lexova lajmin për akuzen ndaj tyre, u ndjeva mirë sepse unë besoj që të dy janë kriminel dhe si të tillë duhen gjykuar dhe dënuar. Por, kur fillova të lexoj më shume dhe të analizoj situatën, mendoj që politikisht kjo akuzë mund t’i bëj dëm Kosovës…Në sytë e njerëzve dhe shteteve të tjera, duket sikur Kosova ka qenë agresori dhe shteti shtypës.”
Një tjetër i ri nga Kosova thotë se në fillim u gëzua pasi “ata që po shkatrrojnë shtetin me në fund u ndalën”, por dhe në gjykimin e tij, akuzat janë “simbolike” dhe do rrëzohen njëjtë si ka ndodhur me të tjera figura të luftës.
Për të gjithë, lufta ka qenë e drejtë dhe e vetmja formë mbijetese për Shqiptarët e Kosovës. Lavdrim Lita e konsideron vendimin si një abuzim politik, i cili “nuk i heq e as nuk i shton gjë luftës së drejtë të shqiptarëve”.
“Mënyra me dinake për të denigruar luften e drejtë të shqiptarëve të Kosovës është perpjekja për ta njehsuar atë me disa personazhe, sado të rendësishem të kenë qenë në këtë luftë. Lufta e shqiptarëve ka qenë e drejtë, e domosdoshme, e pashmangshme dhe është shoqëruar me pasoja të ligjshme, sic e ka verifikuar Gjykata Ndërkombetare e Drejtësise, shpalljen e pavaresisë së Kosovës…Unë besoj në pafajesinë e Thacit dhe Veselit, por edhe nëse provohet fajësia e tyre, as nuk i heq as nuk i shton gjë luftes së drejtë të shqiptarëve. Askush nuk ka të drejtë të fshihet pas lavdisë së luftës!”
“Vetiu, si shumë të tjerëve, më erdhi ndërmend pyetja pse tani? Sigurisht përgjigjia tingëllon e lehtë, pasi 27 qershori ishte vetëm tre ditë larg. Prandaj akuzat për ‘krimet e luftës’ m’u dukën preteksti për një përplasje në të cilën Thaçi dhe Veseli janë ‘viktima kolaterale’, apo anësore, midis qasjes së administratës Trump dhe BE-së mbi perspektivën e Rajonit.”-shprehet Gentian Gaba, një analist i ri politik në Shqipëri.
Pas publikimit të akuzave për mbi 100 krime ndaj serbëve, romëve dhe kundërshtarëve politikë, presidenti Thaci dhe kryeministri Avdullah Hoti anulluan vizitat e tyre në Uashington, duke shtyrë dhe rifillimin e dialogut me Serbinë deri në një moment të dytë. Deri atëherë pritet dhe një akuzë zyrtare e Gjykatës Speciale dhe vendimet politike që do ndjekin publikimin ose jo të kësaj akuze, që mund të detyrojë dy nga figurat kryesore politike të Kosovës në këto momente, të përballen me Gjykatën e Hagës, njëjtë si ndodhi me ish-Kryeministrin Haradinaj disa kohë më parë.
