Paketa anti-shpifje e propozuar nga qeveria, e kthyer në kuvend nga Presienti i Republikës, është kthyer përsëri në qendër të vëmendjes pasi qeveria ka në plan ta miratojë atë në leximin e dytë pa përfshirë rekomandimet e Komisionit të Venecias.
Futja në kalendarin e punimeve parlamentare të kësaj pakete ka alarmuar institucionet ndërkombëtare, ndërsa njëzëri, organizata të ndryshme ndërkombëtare dhe vetë Këshilli i Europës, dhe Eurodeputetë kanë ngritur zërin duke i kërkuar parlamentit që të tërhiqet menjëherë nga paketa anti-shpifje, madje duke kërcënuar se kjo gjë do të jetë pengesë për anëtarësimin e Shqipërisë në Bashkimin Europian.
Stefan Schennach (Austri, SOC), Raportuesi i Përgjithshëm i Asamblesë Parlamentare të Këshillit të Evropës për lirinë e medias dhe mbrojtjen e gazetarëve, ka shprehur shqetësimin e tij serioz në lidhje me mundësinë që Parlamenti i Shqipërisë të miratojë një nismë ligjore, e cilësuar si paketa antishpifje.
Në nisje të sesionit të ri parlamentar, kryeministri Edi Rama kërkoi nga deputetët të shqyrtojnë me prioritet paketën.
“Legjislacioni i propozuar nga Kryeministri shqiptar si një paketë anti-shpifje synon të krijojë një organ administrativ që do të fuqizohet dhe të urdhërojë mediat të heqin raportet e lajmeve mbi çështje të tilla si ‘cenimi i dinjitetit të individëve’. Është e qartë se një ligj i tillë mund të ketë një efekt tronditës mbi lirinë e medias për shkak të kushteve të tij të gjera”, thotë Schennach.
Menjëherë pasi Stefan Schennach (Austri, SOC), Raportuesi i Përgjithshëm i Asamblesë Parlamentare të Këshillit të Evropës për lirinë e medias dhe mbrojtjen e gazetarëve, shprehu shqetësimin e tij lidhur mbi mundësinë që Parlamenti i Shqipërisë të miratojë një nismë ligjore të cilësuar si paketa antishpifje.
Schennach, i ka kërkuar parlamentit shqiptar të heqë dorë menjëherë nga paketa anti-shpifje.
I menjëhershëm ka qenë edhe reagimi i Presidentit Meta.
‘Duhet reflektuar sa më parë!
Çdo kokëfortësi, jo vetëm që nuk i shërben çeljes së negociatave, por nuk do të frikësojë askënd. Përkundrazi!’-shkruan Presidenti Ilir Meta.
7 organizata ndërkombëtare, përmes një letre drejtuar Kuvendit të Shqipërisë, kanë shprehur edhe një herë shqetësimin për paketën anti-shpifje.
Organizatat duke i bërë thirrje deputetëve që të mos e votojnë paketën, rikujtojnë se kjo paketë shkel të drejtën e shprehjes, ndërsa qartasi thonë se: Votimi pa ndryshime, minon procesin e anëtarësimit të Shqipërisë në BE.
Azili ndaj shtetasve turq
Nëntë eurodeputetë paralajmërojnë Ramën të mos ekstradojë Selami Simsek në Turqi
9 Eurodeputetë që i përkasin tre grupimeve në Parlamentin Europian i dërguan një letër të hapurkryeministrit Edi Rama duke i kërkuar të respektojë Konventën e Gjenevës mbi refugjatët dhe Kartën Europiane për të Drejtat Themelore, duke ndaluar ekstradimin drejt Turqisë të Selami Simsek, shtetasit turk që kërkon azil në Shqipëri dhe që prej gjashtë muajsh mbahet i ndaluar pa akuzë.
“Mësuam me shqetësim të madh se në 10 shtator 2020, Komisioni Kombëtar për Azilin dhe Refugjatët i Shqipërisë refuzoi apelin kundër vendimit për të mos i dhënë azil Selami Simsek. Simsek ka deklaruar në mënyrë të përsëritur se ai do të përballet me përndjekje nëse raportohet në Turqi si anëtar i lëvizjes së klerikut Fethullah Gulen, të cilën autoritetet e Ankarasë e konsiderojnë organizatë terroriste,” vijon më tej letra.
“Ne dëshirojmë të kërkojmë një sqarim urgjent nga autoritetet e Shqipërisë mbi situatën e Selami Simsek. Ne dëshirojmë, në të njëjtën kohë, t’i rikujtojmë atyre për nevojën për të respektuar parimet e procesit ligjor dhe detyrimet ndërkombëtare të Shqipërisë, veçanërisht ato në lidhje me Konventën e Gjenevës për Refugjatët e vitit 1951, në të cilën Shqipëria është palë,” shkruajnë eurodeputetët më tej.
Shqipëria është përballur edhe më herët me kritika të forta në lidhje me qasjen që vendi ynë ka pasur ndaj shtatsve turq, të kërkuar në Turqi dhe të ekstraduar me procedura të diskutueshme nga vendi ynë.
Në 1 janar të 2020, Shqipëria ekstradoi në Turqi shtatsin Harun Celik, dhe ky rast nxiti reagimin e ashpër të disa institucioneve ndërkombëtare, për mënyrën si u ekstraua Celik, dhe dyshimet e forta se është shkelur procdura nga pala shqiptare./ HistoriaIme
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.