Rekomandim mbi ndryshimin e kodit të familjes dhe ligjit për birësime, koha për ligje gjithëpërfshirëse

Në kuadër të konsultimeve që Kuvendi i Republikës së Shqipërisë po realizon mbi ndryshimin e Kodit të Familjes, Aleanca Kundër Diskriminimit LGBTI dhe Pro-LGBT, bëjnë thirrje për ligje gjithëpërfshirëse dhe përfshirjen e familjeve LGBTI+, midis partnerëve të të njëjtës gjini, në ndryshimet e parashikuara.

Rekomandimet në vijim synojnë përmirësimin e Kodit të Familjes, por edhe Ligjit të Birësimeve, duke u dhënë mundësinë dhe personave LGBTI+ të ushtrojnë të drejtat e tyre Kushtetuese të martesës, birësimit dhe krijimit të familjes.

Familjet midis personave të së njëjtës gjini janë tashmë një realitet në vendin tonë. Fëmijë të çifteve LGBTI+, mbeten peng i ligjeve aktuale diskriminuese.

Viti 2020 ishte dhe viti i ardhjes në jetë të dy fëmijëve të parë me dy nëna në vendin tonë. Procedurat aktuale të regjistrimit të fëmijëve, nuk u japin mundësinë familjes së sapo-krijuar të regjistrohet përpara autoriteteve dhe të gëzojë të njëjtat të drejta me familjet e tjera në Republikën e Shqipërisë.

Rasti në fjalë, është një nga shembujt e shumtë të mohimit të të drejtës që qytetarët e Shqipërisë kanë për krijimin dhe gëzimin e familjes. Nuk është ky rast as i pari, e nuk do të mbetet as i fundit.

Në vijim, lista e plotë me rekomandimet e drejtuara ndaj Kuvendit, mbi ndryshimin e ligjeve në fuqi.

· Propozojmë ndryshimet në vijim lidhur me Ligjin Nr. 9695, datë 19.03.2007 “Për procedurat e birësimit dhe Komitetin Shqiptar të Birësimit”, të ndryshuar:

1. Neni 2, pika A: pas togfjalëshit “familje birësuese” të shtohet- “pa kurrfarë diskriminimi”;

2. Neni 3, pikat 1, 2, 3: në fund të çdo fjalie që përmbyll përkufizimin për secilën pikë të shtohet fraza- “pa kurrfarë diskriminimi”;

3. Neni 14, pika 1: pas togfjalëshit hyrës “shtetasit shqiptarë,” të shtohet fraza- “që përmbushin kriteret e vendosura nga ky akt lidhur për aplikantin birësues, pa kurrëfarë diskriminimi, që dëshirojnë të birësojnë fëmijë shqiptarë…”;

4. Neni 18, pika 2: në fund të fjalisë që përmbyll pikën 2 të shtohet fraza- “në masën që nevojiten për realizimin e qëllimeve të këtij akti, duke respektuar me rigorozitet parimin e mbrojtjes së të dhënave personale të subjekteve të përfshira dhe parimin e mbrojtjes nga diskriminimi.”

Propozojmë ndryshimet në vijim lidhur me Projektligjin për “Disa shtesa dhe ndryshime në Ligjin Nr. 9695, datë 19.03.2007 “Për procedurat e birësimit dhe Komitetin Shqiptar të Birësimit”, të ndryshuar:

1. Neni 7 lidhur me nenin 13, pika 10: në fund të fjalisë që përmbyll pikën 10 të shtohet- “duke respektuar me rigorozitet parimin e mbrojtjes së të dhënave personale të subjekteve të përfshira dhe parimin e mbrojtjes nga diskriminimi.”

· Lidhur me Ligjin Nr. 9062, DATË 8.5.2003, datë 8.5.2003, “Kodi i familjes”, të ndryshuar dhe Projektligjin për “Disa shtesa dhe ndryshime në Ligjin Nr. 9062, datë 8.5.2003, “Kodi i familjes”, të ndryshuar, në funksion të realizimit të qëllimeve të këtij ligji lidhur me Birësimet, duke respektuar parimin e mbrojtjes nga diskriminimi dhe garancitë kushtetuese të ofruara nga neni 18 dhe 53 të Kushtetutës së Republikës së Shqipërisë, propozojmë:

1. Neni 163: “mes burrit dhe gruas që jetojnë në çift, e karakterizuar nga një jetë e përbashkët, që paraqet një karakter stabiliteti dhe vazhdueshmërie.” të zëvendësohet “mes 2 personave që jetojnë në çift, e karakterizuar nga një jetë e përbashkët, që paraqet një karakter stabiliteti dhe vazhdueshmërie.”;

2. Neni 241, fjalia 3: “fëmija i bashkëshortit” të zëvendësohet me “fëmija i bashkëshortit apo personit bashkëjetues në kuptim të nenit 163 të këtij ligji,..”;

3. Neni 242, fjalia 1: “përveç rastit kur ata janë bashkëshortë” të zëvendësohet me “përveç rastit kur ata janë bashkëshortë apo persona bashkëjetues në kuptim të nenit 163 të këtij ligji”;

4. Neni 252, fjalia 1: “Personat që dëshirojnë të birësojnë të mitur shqiptarë- të shtohet “pa kurrëfarë diskriminimi” mund të birësojnë..”.