2016, – Gëzuar…kush të mundet – Nga Lutfi Dervishi

Nga Lutfi Dervishi*

I dashur Viti i Ri

Nëse e ke të mundur nxito dhe eja sa më shpejt të mundesh. Mezi po të presim.

Është e sigurtë se 200 mijë shqiptarë të presin si ujët e pakët. Shpresojnë t’u sjellësh lajmin e mirë. Kanë plotësuar lotarinë amerikane dhe 2016 e shohin si vitin që mund t’u plotësohet ëndrra e jetës.

Është shumë e vërtetë se 100 mijë shqiptarë nuk do të presin dot sepse gjatë vitit që po mbyllet ikën në Gjermani. Por ama dy qytetarë të tjerë i janë shtuar Shqipërisë: Giaani de Biazi dhe Karlo Bolino. Po të pyesësh qeverinë për 100 mijë të larguarit do të thonë: kanë shkuar në Gjermani që të jenë më afër Kombëtares shqiptare për Euro 2016! Më mirë ta besosh këtë sepse po nuk e besove do ta dëgjosh aq herë sa të mos kesh nevojë më të dyshosh.

Këtu gjërat po ndryshojnë. Për këtë janë të bindur edhe populli edhe qeveria. Ka vetëm një dallim të vogël. Populli thotë se po bëhet më keq, qeveria thotë se po bëhet më mirë. Ekspertët janë ndarë në dy grupe: të qeverisë thonë: do të bëhet me keq, para se të bëhet keq, ndërsa të opozitës thonë: nuk ka më shpresë!

Në fillim e vitit të shkuar situata ishte serioze, por jo pa shpresë. Në fund të këtij viti situata është e pa shpresë, por nuk është më serioze. Ankesat më të mëdha i kanë ata që kanë më shumë: biznesi.  Në fillim të vitit  që iku dëgjoje ankesa për parregullsi në tendera… në fund të vitit nuk ka më ankesa sepse e gjetën zgjidhjen. Tani kanë nisur të shpallin fituesin dhe pastaj bëhet tenderi!

Besoj se e di që këtu gjysma sheshine kafe dhe gjysma e pinë atë. Për çudi të dy gjysmat ankohen. E para se në dyqane këto muaj po shohin më shumë inspektorët tatimorë se klientët, e dyta ankohet se nuk ka punë! Thjesht janë dembelë. Nuk marrin shembull nga i pari i vendit. E ka punën si kryeministër, por ndërkohë bën edhe punë të tjera: bën publicistin dhe është vërtet shumë i mirë në laps, bën piktorin – për pikturat nuk mund të jap ndonjë mendje, por ekspozita po hap në 5 kontinentet dhe ka të ngjarë që ekspozita e tij të jetë e para që do të hapet në stacionin hapësinor, kryeministri bën edhe kuratorin e spektakleve, … dmth bën shumë punë dhe i del koha që të bëj edhe punën për të cilën merr rrogën!

Pronarët shpresojnë shumë tek ti, shpresojnë që të mos marrin më…premtime për pronën. Janë vërtet të çuditshëm, kanë 25 vjet që kërkojnë pronën e tyre. Është në natyrën njerëzore që të mos mësojë nga gabimet e veta. Këta njerëz nuk kanë parë që pronat i marrin ata që nuk e kanë të tyren. Zgjidhja mund të jetë që secili prej pronarëve të kërkoj të marrë pronën e njëri-tjetrit. Mjaft të mos kërkojnë të veten.

I dashur Viti i Ri,

Nuk e di si ke ndërmend të vish, me avion, tren, makinë apo në këmbë, por gjithsesi duhet të kesh parasysh disa gjëra

Nëse vendos të vish me tren, sapo të shikosh trenin hip menjëherë dhe mos e ngatërro me ndonjë lodër. Treni më i gjatë këtu ka dy vagonë. Hip dhe mos pyet pse sepse për pyetjet e vështira këtu si përgjigje merr vetëm një fjalë: tranzicion hesapi!. Hesap është fjalë turke.

Nuk është e këshillueshme të vish me avion drejt e në Tiranë. Është disa herë më lirë të ndalosh në aeroportin e një vendi fqinj- për shembull në Shkup, Prishtinë apo Podgoricë. Që andej merr makinën, por mbushe me karburant pa hyrë në Shqipëri. Janë të sakta informacionet se Shqipëria ka naftë dhe ka pellgun më të madh naftëmbajtës në Europë, por çmimi është më i lartë dhe cilësia më e keqe. Nëse ke pyetje për këtë më mirë mos e bëj se do të mbërrish me vonesë….

Nëse vjen në këmbë ki parasysh se mund të ndalojnë në rrugë ose grabitësit e rëndomtë ose inspektorët tatimorë që do të kërkojnë kuponin për thesin e lodrave. Nëse të ndalojnë të parët edhe mund të negociosh dhe t’ua kthesh mendjen, madje edhe t’i prekësh sepse lodra për fëmijë janë, por me inspektorët nuk ke asnjë shans: Po nise të ankohesh do të thonë: çar problemi ka këtu?!!

Ardhja me makinë nënkupton që duhet të jesh i përgatitur për ndonjë gjobë të lehtë nga policia rrugore. – mund të jesh në rregull me shpejtësinë, rripin e sigurimit, apo me të gjithë dokumentet, por polici mund të thotë: nuk të punon airbag! Mos u përpiq t’i shpjegosh se kjo provohet vetëm në rast aksidenti se do të thonë: pa provoje bjeri kësaj shtyllës….

Kur të vish këtu do të dëgjosh shumë për reformën në drejtësi! Mos u tremb. Këtu ka drejtësi, por ki parasysh që është pak e shtrenjtë. Shëndeti mbi të gjitha. Meqë ra fjala, do të dëgjosh se  shëndetësia është falas. Kjo është e vërtetë, por si hap i parë kjo vlen vetëm për ata që nuk janë të sëmurë.

Megjithatë nuk ka vend për t’u mërzitur.

Ardhja jote do të transmetohet live nga 65 televizione dhe 198 televizione kabllorë. Gjatë paradites shumica e televizioneve këtu japin emisione gatimi, ndërsa në darkë grijnë sallatë!

Dëshirat tona për ty si Viti i Ri janë të thjeshta….

Për vitin 2016 mos na sill shi se këtu një orë shi dhe…përmbytemi. Por duam që edhe të mos ketë thatësirë. Vrit mendjen dhe gjeje vetë si do të bëhet. Që të jemi më konkret: shiun e duam të bjerë vetëm në basenet e liqeneve, në fushat e mbjella, por jo në kanale, hidrovore dhe në qytete.

Qeveria ka zënë mend nga premtimet e pa mbajtura që po ja kujtojnë çdo ditë.

Edhe gjatë 2016 do të bëj premtime, por në të njëjtën kohë po mendon edhe se si njerëzit të mos i mbajnë mend ato. Kjo është sfida që ka qeveria për 2016!

Për çdo problem që do të shfaqet kemi edhe përgjigjen e gatshme: reformë! Nëse problemi nuk zgjidhet, por përkeqësohet atëherë kalohet tek faza e dytë: thellim i reformës dhe nëse problemi qëllon kokëfortë kalohet tek faza e tretë: rifillim i reformës! Nëse përsëritja e 3 etapave nuk jep rezultat atëherë kalohet tek faza e pastrimit të mëtejshëm.

Kështu do të ndodhë edhe ty i nderuar viti i Ri…

Ke kohë vetëm 366 ditë. Në të kundërtën si sot një vit do të nis operacioni: ta pastrojmë nga kalendari edhe këtë vit!

Kemi vetëm një lutje: mos na bëj ta kujtojmë me mall vitin që po ikën!

* SYRI.net

/l.k./