Me afrimin e shtatorit, kur pritet dhe fillimi i vitit shkollor 2020-2021, nxënësit e arsimit para-universitar në vend po përballen me pasiguri dhe mungesë informacioni mbi zhvillimin apo jo të mësimit nëpër shkolla.
Me shtimin e rasteve të të prekurve me koronavirus, shtetet e rajonit po prezantojnë strategjitë e rikthimit të nxënësve nëpër klasa.
Ministria e Arsimit dhe Shkencës në Kosovë njoftoi ditën e djeshme se është në fazën përfundimtare të përgatitjeve për fillimin e vitit të ri shkollor 2020/21, duke parashikuar edhe tre skenarë për organizimin e mësimit në kushte pandemie.
Në Maqedoninë e Veriut gjithashtu strategjia për vitin e ri shkollor pritet të finalizohet javën e ardhshme, të kalojë në një seancë qeveritare dhe të publikohet për qytetarët. Mediat vendase flasin për një model që ndjek protokollet shëndetësore, kombinim i mësimit në klasë në distancë dhe me maska mbrojtëse dhe atij online përmes e-platformave elektronike. Mësimi nëpër klasa pritet të zhvillohet me rotacion midis klasave.
Në Gjermani shumica e shkollave fillore e të mesme janë hapur, me detyrimin e mbajtjes së maskës dhe ruajtjes së distancimit fizik, por është e paqartë nëse situata do vazhdojë kështu për një kohë të gjatë, me shfaqjen e rasteve të të prekurve midis nxënësve.
Dhe ndërsa Ministria e Arsimit, Sportit dhe Rinisë në Shqipëri ende nuk ka publikuar një strategji të mirëfilltë, pritet kombinimi i mësimit në klasa me atë online. Ky i fundit ka krijuar shumë vështirësi për nxënësit, qoftë në terma të marrjes së njohurive, apo dhe në mungesën e mundësive të aksesimit të platformave online apo dhe mungesës së përqëndrimit.
Ekspertët shqiptarë të shëndetësisë janë të idesë se nxënësit, duke mos qenë shënjestër e drejtpërdrejtë e Covid 19, mund të vazhdojnë shkollën, në respektim të distancës sociale dhe respektimit të masave mbrojtëse.
ABC News raporton se disa shkolla jo-publike kanë deklaruar se do të rinisin procesin mësimor me 31 gusht, ndërsa sipas ekspertëve të arsimit, Ministria është shumë e vonuar në planin e punës në prag të vitit të ri shkollor, pasi nuk dihet si do funksionojë shpërndarja e librave dhe si do të menaxhohet ruajtja e distancës fizike të nxënësve.
“Mos të harrojmë që në datën 1 do të fillojë shpërndarja e teksteve shkollore dhe nuk e dimë si do të shpërndahen. Na ndajnë vetëm 12 ditë kur mësuesit do të shkojnë nëpër shkolla. A është bërë gati udhëzimi? Unë nuk di gjë. A është bërë një udhëzim se si do të jetë distancimi”, shprehet Ndriçim Mehmeti, ekspert për arsimin për ABC News.
Shqetësimet e nxënësve, nga mungesa e ndërveprimit social te përqëndrimi
Sipas një anketimi të realizuar nga Grupi Rinor Këshillimor pranë prezencës së OSBE në Tiranë, pandemia ka ndikuar negativisht në procesin e përvetësimit të njohurive të nxënësve të sistemit arsimor para-universitar, ku shqetësimi kryesor për pjesën më të madhe është mungesa e ndërveprimit social me mësuesit e lëndëve. Vetëm gjysma e tyre (52%) e konsiderojnë përgjithësisht mësimin online si pozitiv.
Në lidhje me sfidat kryesore të mësimit onlinë, 70 përqind të të anketuarve u shprehën se mungesa e ndërveprimit social është sfida kryesore duke u pasuar me mungesën e përqëndrimit (55%) dhe mungesa e shpjegimeve të qarta e të strukturuara (31%).
Në anketë i kushtohet rëndësi dhe shëndetit mendor, ku 68 përqind e të anketuarve raportuan se pandemia kishte ndikuar tek shëndeti i tyre mendor, ku 10 përqind raportoi se kishte ndikim të madh në shëndetin mendor ndërkohë që 23 përqind nuk kishte ndikim.
65 përqind të të anketuarve u shprehën optimistë për të ardhmen ndërsa 35 përqind pesimistë.
Mësuesit me pagë të reduktuar në kushte të reja
Me zhvillimin e mësimit online, përpos nxënësve, ishin dhe mësuesit që duhet të përshtateshin me platformat online apo qasjen e tyre në to, si dhe sfidat e strukturimit të lëndëve për tu përshtatur me formatet e reja.
Ndërkohë që qeveria e Kosovës në muaji Prill ka shpërblyer mësuesit me rreth 300 Euro, për zhvillimin e mësimit online, në Shqipëri paga e mësuesve u ul indirekt për shkak të heqjes së pagesave të vështirësisë së largësisë, për mësuesit që duhej të udhëtonin për në vendin e punës si edhe pati zbritje nga pagat e tyre mujore për shkak se orët e mësimit u reduktuan dhe nuk u zhvilluan të plota.
Sipas një anketimi të Swiss Contact mbi mirë-funksionimin e mësimit online, të kryer nga Programi Skills for Job (S4J) në bashkëpunim me Ministrinë e Financave dhe Ekonomisë, sfidat kryesore të evidentuara nga mësuesit gjatë mësimdhënies në distancë ishin: mungesa e materialeve digjitale për 54% të mësueve, mungesa e internetit për 27% të tyre dhe mungesa e pajisjeve elektronike e infrastrukturë fizike të përshtatshme për 22.4% të mësuesve të anketuar.
Ende nuk është folur për mbështetje financiare për mësuesit të cilët kanë reduktuar orët e mësimit gjatë zhvillimit të tij online, ndërkohë që njëjtë si nxënësit, dhe ato duket tërësisht të mospërfshirë në procesin e vendimmarrjes mbi rifillimin e mësimit në shtator, duke mbetur në pritje të një vendimi të ministrisë për tu rikthyer në shkolla apo jo.
Autoritetet botërore në dilemë
Njëjtë si në Gjermani, Danimarkë e Norvegji, shkollat janë hapur dhe në shumicën e Shteteve të Bashkuara. Presidenti amerikan, Donald Trump rriti presionin ndaj guvernatorëve të shteteve për rihapje të shkollave, duke e bërë këtë një prej çështjeve kyçe para zgjedhjeve të muajit nëntor, pavarësisht numrit të lartë të vdekjeve dhe të të prekurve në Shtetet e Bashkuara.
Me hapjen e shkollave, nisën dhe raportimet e transmetimeve të virusit në ambjentet e shkollës, të cilat alarmuan autoritetet vendase por dhe ato Kanadeze, duke i bërë të rimendojnë strategjinë e tyre të rihapjes.
Në Amerikën Latine, pothuajse i gjithë procesi mësimor është duke u kryer përmes platformave online, apo televizionit, meqë pandemia vazhdon të rëndojë gjendjen në këtë rajon, raporton RFEL, ndërsa në Kinë dhe Japoni, shkollat janë hapur prej disa javësh, dhe janë subjekt i mbylljes rast pas rasti kur shfaqen vatra të të prekurve që mund të shfaqin rrezik për komunitetet.
Italia gjithashtu po përgatitet për rinisjen e mësimit në shtator, por shumica e shkollave italiane funksionojnë me banka dhe ulëse të gjera, ku ulen bashkë një numër më i madh nxënësish.
Për të ndryshuar këtë, raportohet se Ministria e Arsimit së fundmi ka shpallur një tender për të siguruar rreth tre milion banka të ndara për në shtator, ku mësimi duhet të zhvillohet duke respektuar rregullat e distancimit social.
Në pritje të një strategjie të vonuar të autoriteteve, nxënësit, prindërit dhe mësuesit mbeten ende të paqartë për zhvillimin e mësimit në kushtet e reja të diktuara nga pandemia e covid-19 në Shqipëri.
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.