Prej më shumë se një muaji tanimë Shqipëria është në izolim të plotë për shkak të situatës së krijuar nga koronavirusi i ri COVID-19, dhe shumë shërbime janë kthyer online.
Një ndër shërbimet që është duke vazhduar online është edhe mësimi.
Ministria e Arsimit ka thënë disa herë që mësimi online po jep rezultate, ndërsa ka thënë se është në dorë të prindërve dhe nxënëseve nëse duan ta përsërisin vitin shkollor, pa u penalizuar.
Por, disa studime të bëra nga organizata dhe grupime të Shoqërisë Civile në vendin tonë, nxjerrin në pah se mësimi online nuk po funksionon.
Kështu, sipas organizatës “Vish këpucët e mija” situata e mësimit online tek fëmijët e komunitetit rom, është alarmante.
Sipas kësaj organizate;
-86% e fëmijëve rom nuk e ndjekin mësimin online.
– 65% e fëmijëve rom, nuk kanë pajisje elektronike, nga mund ta ndjekin këtë mësim.
– 21% e fëmijëve rom, nuk kontaktohen nga mësuesit përkatës.
Në një tjetër studim të kryer nga “Lëvizja për Universitetin” me studentët e Arsimit të Lartë, 1570 studentë kanë dhënë mendimet e tyre në lidhje me mësimin online, ku të dhënat në një pamje të parë janë mjaft shqetësuese.
Konkretisht LPU ka nxjerrë rezultatet e mëposhtme:
1. Rreth 60% e studentëve nuk e konsiderojnë të përshtatshëm mësimin online.
2. Rreth 4% e studentëve nuk kanë akses në internet për të ndjekur mësimin online dhe rreth 45% e ndjekin me vështirësi.
3. Rreth 70% e atyre që e ndjekin mësimin e bëjnë këtë përmes celularit.
4. Vetëm 28% e studentëve i konsiderojnë të përshtatshme video-takimet sipas orarit mësimor.
5. Vetëm 24% e studentëve janë dakordësuar me pedagogët për mënyrat e zhvillimit të mësimit.
6. Përtej 50% të studentëve që ndjehen vetëm të stresuar, rreth 28% kanë vështirësi ekonomike dhe rreth 8% të tjerë./ HistoriaIme
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.