Këshilli Shqiptar i Medias, ka reaguar ashpër për bllokimin nga Autoriteti i Komunikimeve Elektronike dhe Postare, AKEP, i disa faqeve pornografike dhe uebsajtin komunitar Medium.com
KSHM, shprehet në deklaratën e saj se AKEP nuk e ka tagrin ligjor për të bërë këto veprime dhe se vendimi është censurë e pastër, anti-ligjor dhe anti-kushtetues.
Shqipëria me bllokimin e Medium.com, është rreshtuar krah vendeve si Kina, Malajzia dhe Egjipti, që e kanë bllokuar këtë medium, dhe regjimi i të cilave është vënë disa herë në pikëpyetje.
AKEP disa ditë më parë bllokoi disa faqe pornografike, për shkak se prokuroria kishte vendosur që disa linqe të bllokoheshin në vendin tonë, por duke mos pasur mundësi të bllokojë vetëm liqet sipas urdhërit të Prokurorisë AKEP, ka bllokuar të gjitha faqet ku gjendej ai link.
Deklarata e plotë
“Këshilli Shqiptar i Medias reagon me shumë shqetësim ndaj bllokimit nga AKEP të qasjes në uebsajtin komunitar Medium.com. Prej këtij vendimi, Shqipëria i bashkohet 3 shteteve të tjera që e kanë bllokuar Medium: Kina, Egjipti dhe Malajzia. Ky vendim i AKEP është censurë e pastër, është vendim anti-ligjor dhe anti-kushtetues.
Po ashtu, pak ditë më parë AKEP në mënyrë anti-ligjore bllokoi qasjen brenda territorit të Republikës së Shqipërisë në disa uebsajte pornografike, që gjithashtu është një censurë e pastër që e çon Shqipërinë drejt grupit të vendeve si Arabia Saudite, ku këto ëebsajte janë të bllokuara për akses.
AKEP nuk e ka tagrin ligjor për të bërë këto veprime.
“Medium” është një blog ndërkombëtar ku me qindra njerëz postojnë artikuj dhe me mijëra të tjerë informohen përditë mes tyre. Uebsajti Medium qendroi i bllokuar për disa ditë, ndërsa ditën e martë akoma disa ISP nuk e kanë hapur aksesin në të.
Arsyeja e bllokimit të “Medium” ishte një ankimim në AMA e Z. Ermal Mamaqi për publikimin e disa linkeve për në sajtet pirate në këtë portal. Ndërsa rasti i uebsajteve pornografike kishte të bënte me publikimin e një videoje intime të një individi në formën e “revenge porn” (publikimit me qëllim dëmtimi të fotove apo videove intime të një individi). Nëse AMA ka kërkuar mbylljen e medium.com, veprimi i AMA-s do të ishte i jashtëligjshëm. Nëse AKEP e ka ndërmarrë vetë këtë vendim, prapë është veprim i jashtëligjshëm.
KSHM është e përkushtuar për të drejtën e autorit, dhe është një nga promovuesit e mbrojtjes së kësaj të drejte. Por, ajo nuk mund të tolerojë censurën dhe veprime anti-ligjore që bëhen në emër të çfarëdo kauze të drejtë.
P.sh., Në rast se dikush poston në FB vjegëza të sajteve pirate, kjo nuk do të thotë që qeveria shqiptare duhet të mbyllë FB. Aq më tepër, që Medium.com ka një faqe ku qartazi mundësohet raportimi i shkeljes së të drejtave të autorit apo plagjiatura çka e bën akoma më të rëndë rekomandimin e AMA-s dhe censurën e AKEP.
Edhe në rastin e uebsajteve porno, AKEP nuk ka tagër ligjor të bllokojë krejt uebsajtin për një material të vetëm.
“Revenge porn” është një nga fenomenet më të shëmtuara të shoqërisë shqiptare dhe një akt i pastër kriminal. Shteti shqiptar duhet të krijojë mekanizma për të mbrojtur viktimat e “revenge porn” duke dënuar në rradhë të parë personin që e ka shpërndarë këtë video. Por, nëse ajo video po qarkullon në aplikacionin Ëhatsapp, kjo nuk do të thotë që AKEP apo kushdo tjetër duhet të bllokojë përdorimin e tij në territorin shqiptar.
KSHM është shumë e shqetësuar se, ndërsa ligji censurues ndaj medias nuk është miratuar akoma në pritje të vendimit të Komisionit të Venecias, AKEP dhe AMA po veprojnë sikur ky ligj të ishte në fuqi.
KSHM u bën thirrje organizmave ndërkombëtarë të ndërhyjnë ndaj aplikimit të pastër të censurës në territorin shqiptar.
KSHM u bën thirrje mediave partnere të raportojnë fort aktet e censurës.
KSHM u bën thirrje dhe qytetarëve shqiptarë të reagojnë fort ndaj veprimeve që kufizojnë në mënyrë anti-ligjore e anti-kushtetuese të drejtëne tyre për informim.
Së bashku ne duhet të ndalojmë që këto veprime të kthehen në diçka “normale” për Shqipërinë./ HistoriaIme
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.