Kreu i qeverisë së Shqipërisë Edi Rama, përmes një komunikimi në rrjetet sociale ka bërë të ditura masat e reja që do të hyjnë në fuqi nga sot në orën 17:30 deri të hënën në orën 05:00 dhe masat e reja të javës së ardhshme.
Kështu, Rama ka thënë se nga e premtja në orën 17:30 deri të hënën në orën 05:00, do të mbyllet gjithçka, dhe askush nuk mund të lëvizë, përjashto ata të cilët janë në punë e cila është lejuar për fundjavë nga qeveria.
Por duke nisur nga e hëna, në orën 05:00 disa qytete do të kenë masa lehtësuese.
“Nga fillimi i javës tjetër do ketë relaksim më të madh në disa zona të vendit, jo në Tiranë, ku ka shumë popullatë. Do lejohet lëvizje e relaksuar ku ka risk të ulët. Qarku Gjirokastër e qarku Dibër do jetë zonë që do ketë më shumë lehtësim lëvizjesh, edhe Divjaka, Saranda, Himara do kenë liri lëvizjeje. Pogradec, Përrenjas e Librazhd janë po ashtu zona me rrezik të ulët”, tha Rama.
Një shqetësim që i ka ardhur kryeministrit Rama nga shumë qytetarë është leja për të nxjerrë xhiro kafshët e shtëpisë. Kryeministri Rama, tha se nisur nga kërkesat e tepërta, do të ketë një autorizim specifik në portalin E-Albania.
“Kam marrë shumë ankesa të drejta nga njerëzit që kanë qen. Për kafshët do ketë një platformë një autorizim specifik, brenda ditës së nesërme do jenë të gjitha të konsoliduara te E-Albania”-tha kryeminsitri Rama.
Sa i përket pagës së Luftës, sot, Rama ka thënë se këtë pagë do e përfitojnë edhe naftëtarët e Ballshit.
“Do marrin pagë nga paketa e zgjeruar edhe për naftëtarët e Ballshit, kam dashur gjithmonë t’i ndihmoj po ajo është një histori private dhe shumë e ndërlikuar”,- tha ai./ HistoriaIme
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.