Naftëtarët e Ballshit kanë hyrë në ditët e 18 të grevës së urisë.
Naftëtarët kërkojnë pagat e prapambetura, ndërsa bëjnë thirrje për rifillimin e punës në rafineri.
Ditë ne enjte, në grevën e urisë kanë hyrë edhe gratë naftëtare ndërsa kërkesat e tyre janë të qarta: Zbatimi i vendimit të Gjykatës, për pagat e tyre.
Greva e urisë së naftëtarëve u diskutua dhe në parlament. Sipas kreut të grupit parlamentar demokrat, Myslym Murrizi, reagimi i qeverisë është inekzistent.
Ndërsa ndaj kompanisë “Bankers Petroleum”, qasja ka qene ndryshe, tha Murrizi. Ministrja e Financave reagoi, por nuk u ndal te greva.
“Është dita e 15 e grevës në Ballsh dhe atje jetojnë 800 familje me atë uzinë. Nuk shoh asnjë reagim të qeverisë edhe pse premtuat në vitin 2013 se askush nuk do të tallej më me ata punëtorë, ndërsa sot heshtni. 450 mijë euro janë pagat e tyre mujore, 5,4 milionë euro gjatë vitit, 100 milionë euro ka pezulluar ministrja gjobë kompanisë”, tha Murrizi.
“Është një situatë e vështirë me naftëtarët, por disa herë keni përdorur çështjen e “Bankers” në lidhje me emrin tim për një pezullim, por këtu nuk po bëhet fjalë për falje, por po flasim për të mbrojtur buxhetin me akte juridike për të mos shkuar në kosto. Për qytetarët, këto të dyja mos i bashkoni dhe as emrin tim të lidhur me këtë”, u shpreh ministrja e financave Anila Denaj.
Nga ana tjetër pak ditë më parë, kreu i qeverisë Edi Rama, duke thënë se ky është një problem mes naftëtarëve dhe një kompanie private, tha se qeveria e Shqipërisë ka bërë më shumë sesa mundet për këtë temë.
“Sapo të kemi një përgjigje të re do ia jap atyre. Kjo është një marrëdhënie kapitaliste. Nuk është marrëdhënie me shtetin. Deri tani nuk e kam gjetur zgjidhjen. Nuk kemi mundësi të zgjidhim atë problem nëse nuk e merr përsipër kompania private.
Është një marrëdhënie private. Ajo që kemi bërë ka qenë një përpjekje ekstra. Nëse nuk do i kishim bërë do kishin 7 vite më këtë situatë. E kam shqetësim vetë dhe po bëjnë çfarë të mundemi. Është e drejta e tyre të bëjnë grevë por nëse e bëjnë që të sensibilizohem unë, është e kotë sepse unë jam i sensiblizuar”, tha Rama në një konferencë për media./ HistoriaIme
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.