Komiteti Shqiptar i Helsinkit: Qeveria të bëjnë të mundur kthimin e fëmijëve të mbetur në Siri!

Një ditë pas protestës së familjarëve të fëmijëve shqiptarë të mbetur në Siri, edhe Komiteti Shqiptar i Helsinkit ka reaguar në lidhje me këtë situatë.

KShH, duke inkujaruar protestën e një ditë më parë, fton qeverinë dhe institucionet ndërkombëtare që të punojnë më shumë për të bërë të mundur kthimin e këtyre fëmijëve në shtëpitë e tyre.

Deklarata:

Komiteti Shqiptar i Helsinkit (KShH) mbështet dhe inkurajon protestën e qytetarëve, klerikëve dhe familjarëve të fëmijëve që ndodhen në kampet siriane të ISIS-it, të kësaj organizate terroriste të ekstremizmit të dhunshëm.

Rreth 51 fëmijë shqiptarë jetojnë në këto kampe në mjerim dhe frikë, në rrezik të vazhdueshëm për shëndetin dhe jetën e tyre. Ata janë në zonat e luftës, dhe ndihen të përçmuar dhe të kërcënuar. KShH vlerëson se shteti dhe shoqëria shqiptare nuk mund të qëndrojnë indiferentë para kësaj gjendje të shqetësuese.

KShH është i ndërgjegjshëm për vështirësitë që paraqet shpëtimi (largimi) i fëmijëve nga këto kampe, e megjithë këtë, kjo nuk është e pamundur. Nuk duhet lejuar viktimizimi i mëtejshëm i tyre. Ndërgjegjia dhe humanizmi ynë, dashuria prindërore e familjeve dhe të afërmve të tyre e shoqëruar me veprime konkrete japin shpresë për shpëtimin e tyre.

Është kjo arsyeja që KShH i bën thirrje qeverisë shqiptare dhe miqve tanë ndërkombëtare që ta japin kontributin e tyre dhe të koordinojnë veprimet për kthimin e këtyre familjeve në atdheun e tyre.

Gjithashtu, vlen të evidentohet se shtetet janë të lejuara nga e drejta ndërkombëtare të përdorin të gjitha mjetet paqësore për të realizuar të drejtën për mbrojtje diplomatike për shtetasit e tyre, të drejtat e të cilëve janë shkelur ose që ju kanoset një rrezik real në jetën dhe shëndetin e tyre, në një shtet tjetër. Në rastin e Shqipërisë, garantimi i mbrojtjes ndërkombëtare diplomatike ndaj shtetasve përbën një detyrim kushtetues të garantuar në nenin 8 të Kushtetutës tonë./ HistoriaIme