Një bust i Nënë Terezës, i vendosur në Mitrovicë para disa vitesh, është rrëzuar gjatë natës së kaluar. Policia nuk është ngutur me deklarata. Madje, përfaqësues të saj kanë demonstruar një ngut për të dhënë versione pa fajtorë. “Janë dy pista dyshimesh: përveç faktorit njeri, ëhstë edhe dyshimi se bazamenti mbi të cilin ëhstë ngritur busti nuk ka qenë i sigurt; bulonat që e mbanin bustin nuk kanë qenë të shtrënguara mirë”, ka thënë për gazetën Express Avni Zahiti, zëdhënësi i policisë. Me të njëjtat tone ka folur dhe kryetar i komunës.
Por Opinionisti i njohur Nexhmedin Spahiu që në të njëjtën kohë ka qenë dhe kandidat për kreun e komunës në zgjedhjet e sapombyllura, nuk e përjashton versionin që busti të jetë rrëzuar qëllimisht. Dhe me këtë rast është shprehur:
“Si ideator, nismëtar dhe kontribuesi kryesor së bashku me Dr.Don Jak Prenkun, i ngritjes së përmendores së Nënës Terezës në Mitrovicë, shpreh indinjatën më të thellë me rastin e rrëzimit të saj gjatë natës së mbrëmshme. Përmendorja është ngritur me kontributet vullnetare të qytetarëve nga të gjitha trevat shqiptare dhe diaspora ku kontributin kryesor e kanë dhënë vëllezërit Gojcaj nga Amerika. Ngritja e përmendores së Nënë Terezës në qytetin ku 99 për qind të popullsisë janë myslimanë ka qenë një dëshmi e fortë e vlerave islame siç janë mirëkuptimi dhe toleranca. Autorëve potencialë të kësaj vepre të ultë nuk mund t’ua paragjykojë përkatësinë etnike, fetare apo kombëtare, por një gjë është e sigurt: qëllimi i tyre është anti-Mitrovicë, anti-Kosovë, anti-katolik dhe anti-islam”.
/k.p/respublica.al/
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.