Kompania “Teleperformancë” e cila ka të punësuar qindra të rinj në vendin tonë, ka hedhur në rrugë disa nga punonjësit e saj, në mes të krizës së koronavirusit.
Kompania i ka njoftuar disa nga operatorët e saj, se kontrata e punës do të pezullohet përkohësisht, deri në mbarimin e gjedjes së jashtëzakonshme të shpallur nga qeveria.
Por, ky vedim është kundërshtuar nga “Sindikata Solidariteti” sindikatë kjo e cila është krijuar nga operatorët të cilët punojnë në “Call Center”
Mes të pushuarve nga puna është edhe kryetari i Sindikatës Solidariteti, Tonin Preçi, i cili sipas sindikatës, është pushuar në shkelje të Kodit të Punës, përkatësisht neneve 181 pika 4 dhe 5.
Kodi i Punës neni 181 pika 4 dhe 5 thonë shprehimisht se “Zgjidhja nga punëdhënësi i kontratës së punës, për përfaqësuesit e organizatës së punëmarrësve pa pëlqimin e kësaj organizate është e palvlefshme”
Por pavarësisht kësaj, “Teleperformancë” ka pezulluar nga puna operatorë të tjerë dhe kryetarin e sindikatës.
Sindikata Solidariteti shprehet në reagimin e saj:
TELEPERFORMANCA LË PA PUNË DHJETRA PUNËTORË
Kriza e krijuar nga pandemia filloi të prekë punëtorët e call center-it. Sot, dhjetra punëtorë të kompanisë Teleperformance u njoftuan nga kjo e fundit për ndërprerje të kontratës deri në përfundimin e gjendjes së fatkeqësisë natyrore.
Atyre nuk iu dha asnjë shpjegim i mëtejshëm, pa lëre më një zgjidhje për hallin e tyre. Kompania u mjaftua me një copë letër që thotë se do ju njoftojmë kur kriza të kalojë dhe dy fjalë që nënkuptojnë theqafjen për këdo që nuk është i kënaqur me të ngelurit i papunë në mes të fatkeqësisë.
Për ta përkeqësuar edhe më shumë situatën, kjo kompani nuk i ka paguar ditët të cilat janë detyruar dhjetra punëtorë nga kjo e fundit të futen në karantinim si pasojë e frikës së përhapjes së virusit pas identifikimit të rastit të parë të njërit prej kolegëve të tyre.
Një veprim i tillë nuk është vetëm shkelje e parimeve të të drejtave të punës, por krim dhe shkelje e të drejtave themelore të njeriut.
Mes të pushuarve nga puna është edhe kryetari i Sindikatës Solidariteti, Tonin Preçi, rast i cili përbën shkelje më vete të Kodit të Punës, respektivisht Nenit 181, Pikave 4 dhe 5.
Punëtorët nuk duhet të paguajnë barrën financiare të kompanisë si rezultat i fatkeqësive natyrore.
Ndërhyrja e shtetit është e domosdoshme. Inspektorati i Punës duhet të marrë masat e nevojshme që punëtorët të mos mbeten në mëshirë të fatit dhe ditët e karantinimit të detyruar të paguhen plotësisht.
Kriza nisi, sindikata do të jetë domosdoshmëri për muajt në vazhdim dhe më tej!/ HistoriaIme
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.