Viktima e parë në Shqipëri, shtrëngim i mëtejshëm i masave të sigurisë

Ministria e Shëndetësisë njoftoi ditën e sotme viktimën e parë të prekur me koronavirus, disa orë pasi u konfirmua rasti i saj.

Një zonjë 73 vjeçare nga Durrësi, e cila ishte shtruar në spitalin e Durrësit prej thuajse një jave për komplikacione të tjera shëndetësore nga komplikacionet e rënda, humbi jetën ditë e sotme si pasojë e disa sëmundjeve bashkëshoqëruese kardiake dhe pulmonare.

Mediat njoftojnë se 2 mjekë janë vendosur në vetë-karantinim, ndërsa analizat u janë kryer dhe 30 mjekëve dhe infermierëve të tjerë që kanë kuruar zonjën e prekur me koronavirus, e cila ishte kthyer disa ditë para se të shtrohej në spital nga qyteti i Bolonjës në Itali. Zonja ka qëndruar në kushte normale spitali, me të tjerë pacientë të shtruar në dhomë dhe vizitat e familjarëve vijonin si normalisht deri ditën e djeshme, kur gjendja e saj u komplikua rëndë dhe u mor kampioni për Covid-19.

73 vjeçarja u nis pak më parë me urgjencë drejt Tiranës, por u rikthye sërish në reanimacionin e Spitalit të Durrësit, pasi ishte në gjendje të rëndë shëndetësore dhe nuk e përballonte dot udhëtimin.

Ndërkohë bashkë me viktimën e parë, numri i të infektuarve për momentin është 12, ndërsa priten rezultatet e familjarëve të viktimës dhe stafit spitalor apo personave të tjerë që kanë qenë në kontakt me të.

3 prej të prekurve janë të shtruar në Spitalin Infektiv në gjendje të qëndrueshme shëndetësore, pa probleme të veçanta.

7 prej persona të tjerë të identifikuar COVID-19 pozitiv janë në vetëizolim pa shenja klinike të infeksionit respirator. Ndërsa 104 persona, kontakte të personave të identifikuar me COVID janë në vetëkarantinim”, tha zv.ministrja e Shëndetësisë Mira Rakacolli në një konferencë për shtyp.

Prej ditës së sotme, janë përforcuar masat e sigurisë me mbylljen e disa bareve dhe lokaleve të natës, mbylljen e palestrave, klubeve dhe pishinave si dhe ndalimin e udhëtimeve drejt Italisë.

Zyrat e administratës publike do vijojnë të mbyllura, ndërsa dokumentet e rëndësishme e pensionet do të shpërndahen përmes postës.

Kryeministri Edi Rama paralajmëroi se nga dita e nesërme do të vendosen postblloqe të Policisë së Shtetit dhe Ushtrisë në të gjitha rrugët e Tiranës, për të kontrolluar të gjitha makinat, nëse ka persona të ardhur 14 ditët e fundit nga Italia ose Greqia dhe që nuk qëndrojnë të karantinuar nga frika e koronavirusit. Kreu i qeverisë paralajmëroi se nëse do të kapet ndonjë person i kthyer, që lëviz i lirë nëpër Tiranë, do të gjobitet me 5 mijë euro dhe nuk do të lejohet të dalë më jashtë vendit pa paguar këtë gjobë.

Gjendja në Europë
Ndërkohë që Italia ka forcuar më tej masat duke ndaluar të gjithë format e lëvizjeve brenda dhe jashtë vendit, vende të tjera në Europë po përgatiten për epideminë duke ndaluar tubimet publike, në disa raste duke mbyllur shkollat apo dhe qendrat tregtare.

Ministri britanik i shëndetësisë është testuar pozitiv për koronavirusin, duke ngritur frikën për përhapjen e mundshme të sëmundjes përmes qeverisë së Boris Johnson. Nadine Dorries, deputete e parlamentit britanik u diagnostikua, disa ditë pasi u takua me kryeministrin, të fejuarën e tij shtatzënë dhe dhjetëra figura të tjera në një pritje të Downing Street. Një politikan spanjoll i një partie populiste të djathtë, u infektua pas pjesëmarrjes së një mitingu masiv gjatë të dielës së kaluar.

Turqia njoftoi rastin e saj të parë, në Belgjikë u shënua vdekja e parë ndërsa 168 njerëz të tjerë kanë vdekur në Itali gjatë ditës së fundit.

Austria ka mbyllur kufijtë e saj me këdo që arrin nga Italia, ndërsa Komisioni Evropian po rishikon rregullat e fluturimit për të përballuar humbjet kolosale që po vinë nga industria e aviacionit.

Masat shtrënguese kanë sjellë anullimin e milionave rezervimeve, duke bërë të pamundur operimin e fluturimeve që ende janë të lejuara, ku mesatarisht 80% e vendeve në avion mbeten bosh.