Votuesit në Zvicër, një nga vendet e fundit të Evropës Perëndimore që ende ndalon martesat e homoseksualëve, do të vendosin në një referendum këtë të dielë (26 shtator) nëse do të lejojnë çiftet e të njëjtit seks të martohen dhe të birësojnë fëmijë.
Qeveria federale dhe parlamenti kanë miratuar tashmë ligjin e ndryshuar, por kundërshtarët e udhëhequr nga Partia Popullore Zvicerane e krahut të djathtë (SVP) detyruan një referendum mbi çështjen nën sistemin e demokracisë direkte të Zvicrës.
Sipas sondazhit të fundit të opinionit, përkrahësit e martesave të të njëjtit seks ishin në krye, me 63% të të anketuarve që thanë se ishin pro.
Treguesit e parë nga votimi priten rreth orës 10:30 GMT dhe rezultati përfundimtar pritet të dalë gjatë ditës.
Ligji i ndryshuar do të bëjë të mundur që çiftet e të njëjtit seks të martohen dhe të birësojnë fëmijë që nuk kanë lidhje me ta.
Çiftet lezbike të martuara gjithashtu do të lejohen të kenë fëmijë përmes dhurimit të spermës, aktualisht e ligjshme vetëm për çiftet heteroseksuale të martuara.
Gjithashtu ligji do ta bëjë më të lehtë për bashkëshortët e huaj të një individi zviceran të marrin shtetësinë. / HistoriaIme
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.