Naftëtarët e Ballshit në grevë, 4 muaj pa paga

Uzina e Ballshit ka ndaluar punimet prej muajit shtator 2019 dhe për pasojë qindra punonjës kanë mbetur të papunë.

Punonjësit e rafinerisë së naftës, prej 2 javësh tashmë po protestojnë për marrjen w pagave dhe rifillimin e aktivitetit të Uzinës. Prej 4 muajsh, punonjësit ende nuk kanë marrë pagat e prapambetura.

Naftëtarët kërkojnë ndërhyrjen e autoriteteve për t’i dhënë një zgjidhje problemit të tyre. Numërohen rreth 800 naftëtarë që kanë mbetur pa punë që kur uzina ka ndaluar aktivitetin e saj në shtator.

Ditën e hënë, ata njoftuan dhe hyrjen në grevë urie, si përshkallëzim i protestës, për të cilën ende nuk ka një reagim zyrtar.

Sipas raportimeve të mediave lokale, naftëtarët janë vendosur në një nga mjediset e qendrës shëndetësore të Uzinës së naftës dhe kanë deklaruar se greva është pa afat dhe se do të vazhdojnë të protestojnë për kërkesat e tyre.

Sipas naftëtarëve problemi është i mbartur me vite, ndërsa pak kilometra më larg, punonjësit e stacionit të pompimit të Poçemit kanë 7 ditë në grevë urie pasi nuk kanë marrë 27 rroga.

Ata gjithashtu njoftuan se kompania private i kishte ofruar kontratë të re që nga marsi, pa njohur pagat e prapambetura, por naftëtarët nuk kanë rënë dakort.

Përfaqësuesit e uzinës e kanë lidhur ndëprerjen e aktivitetit gjatë këtyre muajve me mungesën e naftës bruto që sigurohet nga kompania “Bankers Petroleum”, por në gati 5 muaj, asnjë përfaqësues zyrtar apo institucion vendimmarrës nuk ka reaguar për zgjidhjen e situatës, duke lënë familjet e 800 naftëtarëve në një situatë më të rënduar ekonomike se zakonisht.

Mbi situatën e krijuar, reagoi ditën e sotme dhe Komiteti Shqiptar i Helsinkit, duke kërkuar ndërhyrjen e organeve kompetente për zgjidhjen e situatës së krijuar.

“Është detyrim i shtetit të ndërhyjë kur të drejtat e njeriut cënohen edhe kur ata punojnë në sektorin apo sipërmarrjen private.“

“Indiferentizmi në në një shkelje kaq brutale të të drejtave të punonjësve që vazhdojnë grevën e urisë për KShH është e papranueshme. Shteti ka detyrime pozitive të ndërhyjë në raste të tilla, ta zgjidhë çështjen dhe të vendosë përpara përgjegjësisë ligjore ata që e kanë shkaktuar atë. Detyrimi pozitiv i shtetit në raste të tilla është sanksionuar në disa vendime të Gjykatës Evropiane të të Drejtave të Njeriut.”, shkruhet në njoftimin e KSHH.