Raporti i Lumturisë: Shqipëria zbret 33 vende në klasifikim

Zvicra mund të jetë e famshme për sistemin e saj bankar, por sipas raportit të fundit global për lumturinë, zvicerianët janë gjithashtu populli më i lumtur në botë. Sipas studimit vjetor të Kombeve të Bashkuara, Zvicra është shteti më i lumtur për të jetuar. Shteti i dytë më i lumtur është Islanda, e ndjekur nga Danimarka, Norvegjia dhe Kanadaja.

Raporti merr në konsideratë faktor si Prodhimi i Brendshëm Bruto për frymë, pereceptimi i korrupsionit, mbështetja sociale, jetëgjatësia, apo liria për vendimarrje në jetë.

Por ku ndodhet Shqipëria në këtë raport?
Duket se Raporti i Lumturisë në Botë e nxjerr vendin tonë ndër vendet më pak të lumtura. Shqipëria ndodhet në vendin e 95-të, nga 158 vende të studiuara. Nisur nga raporti i vitit të kaluar, ka zbritur plot 33 vende në klasifikim.

Krahasuar me rajonin, Kosova renditet disa vende përpara nesh, duke zënë kështu vendin e 69-të, Serbia e 87-a, Maqedonia e 93-a, Mali i Zi i 83-i, dhe vetëm Bosnja dhe Hercegovina renditet një vend pas nesh, e 96-a.

Që kur u publikua për herë të parë në 2012-ën, Raporti Botëror i Lumturisë tregoi se mirqënia dhe lumturia janë tregues kritik të zhvillimit ekonomik dhe social të një kombi, ndaj duhet të jenë synim kyç i politikës.

Tjetër përfundim i raportit është fakti që femrat janë më të lumtura se meshkujt në të gjithë botën.