Venezuela në udhëkryq, miliona njerëz në demostrata për rrëzimin e diktaturës

Venezuela po përjeton momente ankthi dhe shprese. Pas trazirave politike të javëve të fundit duket se ende ka shpresë për rrëzimin e diktaturës së Nicolas Maduro, pasuesi i Hugo Chavez.

Vendi i Amerikës Jugore, tashmë i sfilitur nga kriza politike dhe ekonomike që ka rrënuar mirëqenien e shtetit me 31 milionë banorë, ka arritur sot në një tjetër moment kulminant, me liderin e opozitës dhe njëkohësisht kreun e Parlamentit Juan Guaido që është vetëshpallur president i përkohshëm deri në zgjedhjet e reja.

Juan Guaido, fituesi i zgjedhjeve presidenciale të vitit të shkuar, u njoh si President i vendit nga qeveritë e shteteve fqinje, qeveria e Shteteve të Bashkuara, Bashkimi Europian dhe madje edhe nga qeveria e Shqipërisë dhe dhjetëra shteteve të tjera.

Në demostratat e shumta popullore, qindra mijëra qytetarë kërkuan largimin e Maduros dhe rrëzimin e diktaturës së tij, që e ka zhytur shtetin e Amerikës Jugore në varfëri, me miliona qytetarë që vuajnë përditë nga uria, qindra mijëra refugjatë të larguar në vendet fqinje dhe ekonomi të rrënuar. Opozita e Maduros akuzon ushtrinë dhe autoritetet se kanë vrarë me dhjetëra protestues gjatë demostratave, e shumë prej tyre rezultojnë të zhdukur pas përplasjeve me policinë.

Maduro ndërkohë ka thirrur mbështetësit e tij në pallatin presidencial dhe nga ballkoni i tij ka deklaruar se “ky është një grusht shteti. Jemi shumica, jemi bijtë e Hugo Chavez. Jemi këtu me vullnetin e popullit dhe asnjë nuk do të na largojë”. Maduro i ka dhënë 72 orë trupit diplomatik amerikan të lejë vendin, duke vendosur pezullimin e marrëdhënieve me Uashingtonin.

Në rrjete sociale, kanë nisur fushata për mbështetjen e qeverisë së re anti-Maduro ndërkohë që situata politike në vend mbetet ende e rënduar dhe e paqartë, me protestues të të dy krahëve që vërshojnë në sheshe./k.j