Të gjithë me sytë nga të drejtat e njeriut

Ditën e enjte, u organizua në ambjentet e qendrës Destil në Tiranë ekspozita e fotografisë me titull “All Eyes on Human Rights”.

11 fotografë, 16 fotografi, të gjitha me tema që prekin përditshmërinë tonë.

Ekspozita është menduar si një pikë takimi midis artistëve të rinj, të cilët kanë zgjedhur artin e fotografisë për tu dhënë zë mendimeve të tyre dhe kauzave të cilat kanë përzemër, si dhe publikut të gjerë, i cili njeh më mirë fenomene shqetësuese që prekin të drejtat e njeriut.

Protestat, ndotja, puna e rëndë e grave në zonat rurale në vend, dhuna në familje, mjedisi, mungesa e strehimit, ishin vetëm disa nga temat që ishin prekur nga fotografitë e prezantuara në ekspozitë.

Ekspozita në fjalë ishte pjesë e një projekti më të gjerë të organizatës Pro-LGBT dhe Historia Ime, i mbështetur nga qeveria e Mbretërisë së Bashkuar, me qëllim promovimin e gazetarisë qytetare cilësore, e cila nxit reagimin shoqëror dhe debatin përmes krijimtarisë mediatike.

“All Eyes on Human Rights”, është produkt i punës disa mujore të Historia Ime për nxitjen e kësaj gazetarie, si dhe inkurajimin e vetë qytetarëve për tu bërë ata folësit më të mirë të shqetësimeve të tyre.

Ky ishte konkursi i gjashtë i fotografisë, i organizuar nga Historia Ime, i cili gjithmonë ka sjellë të drejtat e njeriut në vëmendjen e publikut të gjerë përmes një forme të veçantë komunikimi, siç është fotografia.

Në vijim ju prezantojmë me të gjithë fotografitë e prezantuara në ekspozitë, si dhe fotografinë fituese, nga fotografi i ri Ronald Qema, e cila mori vlerësimin maksimal nga juria e konkursit të fotografisë.