Popullsia e botës në rritje deri në fund të shekullit, shifra alarmante për Shqipërinë

Projeksionet e rritjes së popullsisë në botë janë disa nga statistikat më të mirë studiuara për shkak të ndryshimeve të mëdha globale dhe problemeve që vendosin sot në rrezik jetën e miliona njerëzve në botë.

Pakësimi dhe keqmenaxhimi i resurseve natyrore, ngrohja globale, ndotja dhe mungesa e hapësirës fizike për strehim janë vetëm disa nga problemet që vinë me rritjen e vazhdueshme të popullsisë.

Por sipas një studimi të fundit nga Phew Research që merr në kosnideratë të dhënat e Kombeve të Bashkuara, popullsia e botës do vijojë rritjen deri në fund të këtij shekulli, për tu pasuar me një ulje graduale dhe ulje të normës së shtimit natyror.

Arsyet kryesore të ndalimit të rritjes janë ulja e fertiliretit kudo në botë. Me zhvillimin ekonomik të rajoneve të mëdha në Afrikë dhe Azi, në vitin 2100 popullsia priret të kap shifrën e 10.9 miliardë njerëzve.

Midis viteve 1950 dhe ditëve të sotme, popullsia botërore është rritur mesatarisht me 1 deri 2 %, duke shkuar nga 2.5 miliardë në vitin 1950 në 7.7 miliardë në 2019-ën.

Afrika është kontinenti i vetëm ku popullsia do vijojë të rritet. Në vitin 2100 në këtë kontinent popullsia pritet të jetë 4.3 miliardë njerëz, ndërsa në Azi ajo do bjerë nga 5.3 miliardë që është sot në 4.7.

Përsa i përket Shqipërisë, shpopullimi pritet të vazhdojë e bashkë me të dhe fenomeni i emigracionit.

Në studim përmendet Shqipëria si një kuriozitet, ku pritet të kthehet në vendin me popullsinë më të vjetër në botë, duke ja kaluar dhe Japonisë.

Mosha mesatare në Shqipëri pritet të jetë 61 vjeç, ndërsa në Japoni, shteti me popullsinë më të vjetër aktualisht, në vitin 2100 mosha mesatare do të jetë 54 vjeç. /k.j