Për shkak të situatës së krijuar nga pandemia e COVID19, janë të shumtë individët e komunitetit LGBTI që kanë mbetur të papunë dhe që janë detyruar të mbyllen në shtëpitë e tyre, pa pasur qasje në shërbimet e shumta që ofrohen normalisht pranë qendrës komunitare të Aleanca LGBT.
Që prej marrjes së masave për parandalimin e përhapjes së COVID19, Aleanca LGBT mbylli qendrën ditore, duke u fokusuar në ofrimin e shërbimeve psikologjike, asistencës ligjore apo ndjekjes së rasteve përmes platformës SOS-LGBT, e cila është e aksesueshme përditë në oraret 12:00 – 14:00 dhe 16:00 – 18:00.
Por përpos asistencës psikologjike, janë dhe disa raste individësh, të papunë kryesisht, të cilët e kanë të pamundur të mbulojnë dhe shpenzimet për ushqimet bazë për të kaluar ditët në vetë-karantinim.
Duke qenë se situata e krijuar ka detyruar dhe vetë punonjësit e organizatave tona të punojnë nga shtëpitë e tyre, vendosëm që disa zëra dhe parashikime të buxheteve tona nga projekti PRIDE II, të dedikuara për shpenzime të ndryshme që nuk do t’i realizojmë në këto ditë, t’i bëjmë blerje produktesh ushqimore bazë për individë në pamundësi ekonomike dhe që i përkasin komunitetit LGBTI.
Këto janë ditë SOLIDARITETI dhe DASHURIE.
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.