Në kuadër të Ditës Ndërkombëtare në Përkujtim të Personave trans të vrarë, organizata “Transrespect versus Transphobia Worldwide” ka publikuar rezultatet e një kërkimi të titulluar “Trans Murder Monitoring”, të fokusuar në raportimin e personave të vrarë nga komuniteti trans si pasojë e krimeve të urrejtjes. Ky projekt synon rritjen e ndërgjegjësimit rreth komunitetit trans dhe vështirësive që ky komunitet ka si dhe përkujtimin e të gjithë viktimave të krimeve të urrejtjes si pasojë e transfobisë.
Projekti ka nxjerrë në dritë numrin total të vrasjeve të personave trans: 369 raste të raportuar të vrasjeve të personave trans dhe personave me identitet gjinor jo-binar midis 1 tetorit 2017 dhe 30 shtator 2018. Krahasuar me vitin e kaluar kemi të bëjmë me 44 raste më shumë si dhe me 74 raste më tepër krahasuar me të dhënat nga viti 2016. Shumica e këtyre vrasjeve kanë ndodhur në Brazil (167), Meksikë (71), SHBA (28) dhe Kolumbi (21).
Personat trans dhe ata me identitet gjinor të papërcaktuar përballen me krime urrejtje të tmerrshme si: dhuna, zhvatje, ngacmime seksuale dhe dhunë fizike, dhe vrasje në jo pak raste. Në shumicën e vendeve të dhënat për personat trans të vrarë nuk regjistrohen sistematikisht dhe është e pamundur të përllogaritet numri aktual i viktimave.
Dhuna ndaj personave trans lidhet dhe me segmente të tjera të dhunës në shoqëri si: racizmi, seksizmi, ksenofobia dhe diskriminimi. Të dhënat nga kërkimi treguan se viktimat e këtyre krimeve janë në shumicën e rasteve punonjëse seksi (62%)./k.m/
Burimi: Transrespect versus Transphobia Worldwide
You may also like
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.