Streha mbetet pranë komunitetit LGBT në këto ditë të vështira

Miliona qytetarë në mbarë botën janë izoluar tanimë, dhe dhjetëra shtete kanë vendosur atë që quhet “distancim fizik” mes njerëzve, në kohën kur pandemia e koronavirusit të ri COVID-19, është duke u përhapur dhe shifrat janë alarmante në glob.

Qendra “Streha” dhe organizatat e tjera LGBTI në vendin tonë, janë duke bërë përpjekje maksimale që të ofrojnë ndihmë tek personat e komunitetit në këtë kohë të pazakontë.
Në një intervistë për “Historia Ime” Drejtori Ekzekutiv i “Qendra Streha” Elvis Popaj, ka treguar më shumë si po ndihmohet komuniteti, dhe ҫfarë duhet të bëjnë të rinjtë LGBTI nëse hasin vështirësi, ku dhe si mund të kontaktojnë.

Si po ndihmon “Streha” komunitetin LGBTI në këto ditë izolimi?

Elvis Popaj: Që kur nisi kriza shëndetësore në Itali, në gysëm të shkurtit, ne kemi marrë masa shtesë, që lidheshin kryesisht me higjienën. Jemi përpjekur të mos ndryshojmë natyrën e shërbimeve, kemi hasur pak vështirësi në këtë periudhë, ngaqë shërbimet jashtë kanë ndryshuar. Gjithsesi, pavarësisht situatës, ne vazhdojmë të japim shërbimet tona, të lidhura me natyrën e shërbimeve që japim, gjatë kësaj kohe jemi fokusuar tek shërbimet bazike, si ushqimi dhe strehimi.
Personat që gjenden në “Streha” nuk kanë pasur problem shëndetësore që lidhen me COVID-19. Ne jemi përpjekur që të karantinojmë të gjithë përfituesit, ata nuk dalin jashtë për asnjë arsye, dhe kontakti mes stafit dhe përfituesit është sa më minimal.

A ju janë kontaktuar të rinjtë LGBTI në këtë kohë të vështirë, pasi ka edhe nga ta që janë detyruar të izolohen së bashku me prindërit e tyre homofobë?

Elvis Popaj: Po, kemi pasur raste të shtuara të këshillimit psikologjik, ashtu si kemi pasur persona të komunitetit kryesisht transgjendër, që gjenden në Tiranë dhe kanë nevojë për ndihma esenciale që lidhen sidomos me ushqimin. Ka persona që mund të kenë përfituar edhe më parë nga Streha, por edhe raste të reja, ne jemi munduar me tërë kapacitetet tona që tu ofrojmë ndihmë me gjithe stafin tonë. Kjo është një kohë e vështirë, sidomos për personat transgjinorë që gjenden të izoluar. Jemi përpjekur maksimalisht që t’i ndihmojmë dhe të plotësojmë nevojat bazike të tyre.

Cilat janë disa nga nevojat më të mëdha të komunitetit në këto kohë?

Elvis Popaj: Gjatë kësaj kohe, nevojat kanë qenë të lidhura me nevojat ushqimore më së shumti, nevojat që lidhen me strehimin, por ka pasur raste edhe me nevojat për të lëvizur jashtë Tiranës, për shkak se një pjesë e tyre nuk jeton me familjen në Tiranë, dhe gjatë kësaj kohe ka dashur që të shkojë tek prindërit. Natyrisht ka pasur probleme që lidhen edhe me stresin, dhe me nevojën për të folur me dikë, që zakonisht është psikologia e shërbimit.

Ҫfarë duhet të bëjnë të rinjtë LGBTI që të shmangin stresin e këtyre ditëve?

Elvis Popaj: Kjo duhet kuptuar që është universlisht një kohë e vështirë, dhe që do të thotë që stresi dhe ankthi janë reagime shumë të zakonshme në këtë situatë. Së dyti, është e rëndësishme që gjatë kësaj periudhe të ruajmë lidhjet tona, dhe ti fuqizojmë ato lidhje. Edhe si kohë, kjo situatë na mëson disa gjëra të tjera, për shembull të mos përqafohemi, të mos japim dorën, por shfaqja e ngrohtësisë bëhet përmes këtyre gjesteve, dhe duket një kohë e dëmshme në tërësi për psikologjinë e njerëzve, megjithatë lidhjet mund të ruhen në mënyra të tjera, përmes telefonit, dhe komunikimit. Për ata që janë të marxhinalizuar, është shumë e rëndësishme që të marrin shërbimet e duhura, nëse të mungon ushqimi dhe duhet të përballesh edhe me këtë kërcënim ekzistencial, stresi është i dyfishtë, edhe gjatë kësaj kohe është e rëndësishme që të kontaktojnë me shërbime që mund të ndihmojnë, dhe shërbime të tjera që kanë në zonë. Në terma të përgjithshme është e rëndësishme që të ruajmë rutinën tonë, rutinën e gjumit, e ushqimit, dhe rutinat e lidhura me punën. Është e rëndësishme të kuptojmë se ky është një kërcënim real për shëndetin, por statistikat tregojnë se vetëm një pjesë e vogël e personave që marrin virusin kanë fatalitet.

Si mund të kontaktojmë për ndihmë?

Elvis Popaj: Më e thjeshta është të kontaktoni tek numri ynë, është 24 orë i arritshëm, 069 983 91 89, aty mund të kontaktojnë në whats app, viber, ose duke telefonuar, por edhe në mediat tona sociale, facebook e rrjete të tjera. Ne kemi një ekip, punonjës social, psikologë, dhe menaxheret e rasteve që bëjnë një vlerësim të nevojave dhe tregojnë ndihmën që mund të japin.

A mund të ndihmoni të rinj edhe në rrethe në këtë kohë?

Elvis Popaj: Po, sigurisht. Natyrisht ne përpiqemi maksimalisht që të japim ndihmë esenciale. Ne mund të japim këshillim online, nëse nuk është e mundur takimi.