4 dhjetori i vitit 2018, shënon pikënisjen e protestave masive studentore, të cilat ngritën në këmbë studentë jo vetëm nga universitete të Tiranës, por jehona u përçua dhe zjarri u ndez edhe në vatrat studentore të qyteteve të tjera. Tashmë, ndodhemi thuajse një vit më pas nga ato ditë të vrullshme protestash dhe një viti të gjallë organizimesh që rithyen vëmendjen popullore në çështjet e arsimit të lartë dhe lajmi se do të ketë sërish protestë këtë dhjetor, është ende i freskët.
Mbrëmjen e djeshme, faqja zyrtare e lëvizjes “Për Universitetin” ka njoftuar organizimin e një proteste masive përballë Ministrisë së Arsimit, në datën 4 dhjetor 2019, ora 11:00. Aktivistë të Lëvizjes janë shprehur, se nuk është thjesht një protestë e cila rikujton me nostalgji dhjetorin madhështor të vitit të kaluar, porse do të dëshmojë realisht se problemet në arsim nuk kanë marrë fund, vetëm sa janë thelluar.
Lëvizja “Për Universitetin” i ka paraprirë lajmërimit për protestën në fjalë, me organizime qysh prej fillimit të vitit akademik 2019-2020, duke organizuar takime dhe tryeza që u thërrasin studentëve dhe pedagogëve të mblidhen rreth idesë së një universiteti më të mirë, që fillon prej ndërgjegjësimit dhe luftës ndaj problematikave aktuale duke u organizuar bashkërisht. Prej më shumë se 2-javësh deri më tani, tryezat masive dhe optimizmi i studentëve për rinisjen e protestave, ka dhënë shkëndijën se kjo ditë do të jetë pikërisht me 4 dhjetor.
Burimi: Lëvizja për Universitetin
Nga lajmërimi i bërë dhe narrativa energjike e aktivistëve të LPU, duket se studentët këtë vit janë të mirëorganizuar dhe se në ndryshim prej spontanitetit të vitit të kaluar, këtë vit ujërat janë nën kontroll, si dhe studentët janë një hap më pranë drejt rrëzimit të ligjit të arsimit të lartë, i cili ka sjellë dhe ka thelluar akoma më shumë problematikat e jetës universitare.
“NE DO TË FITOJMË!
BASHKË ME STUDENTËT, E GJITHË SHOQËRIA!” mbyllet njoftimi entuzist në faqen zyrtare të lëvizjes “Për Universitetin”.
Burimi: Për Universitetin
Burimi i foto cover: Eraldo Halili
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.