Duket pothuajse e pashmangshme që Ursula von der Leyen, presidentja e sapo-zgjedhur e Komisionit Evropian, do të ketë një luftë të ashpër me qeveritë e vendeve anëtare të BE mbi balancën gjinore të nominimeve të tyre për komisionerët e BE.
Gjatë prezantimit të platformës së saj javën e shkuar, Ursula von der Leyen premtoi se do të siguronte “barazi të plotë gjinore” në ekipin e saj të komisionerëve të BE.
Secili shtet anëtar i Bashkimit Evropian ka të drejtën e nominimit të një komisioneri dhe mesa duket lobimi i presidentes së re, po shtrihet në të gjithë nivelet drejtuese të BE-së, për të nxitur shtetet anëtare për të sjellë emra grash politikane për postin e komisionerëve.
Von der Leyen tha në takimet me grupet parlamentare javën e kaluar se ajo dëshiron që çdo vend i BE të paraqesë një kandidat mashkull dhe një femër për postin e komisionerëve.
Por tre vende deri tani, Austria, Greqia dhe Sllovenia, e kanë sfiduar atë duke paraqitur vetëm një kandidat mashkull. Të tjerë vende anëtare që bënë të njëjtën gjë përpara se von der Leyen të njoftojë planin e saj për përfaqësim të barabartë, duket se nuk kanë ndërmend të tërheqin kandidaturat e tyre.
Të pakët janë shtetet që duan të rikthejnë komisioneret e tyre gra, apo kanë nominuar politikane për vendin e tyre të komisionerit. Në raportet e tanishme, sipas emrave të propozuar, 10 komisionerë janë meshkuj dhe vetëm 5 janë femra. Për një balancë të plotë, duhet që nga 13 vendet që ende nuk kanë vendosur, 9 shtete të zgjedhin një grua si komisionere.
“Nëse shtetet anëtare nuk propozojnë mjaftueshëm gra komisionere, unë nuk do të hezitoj të kërkoj emra të rinj,” tha von der Leyen në prezantimin e saj përpara Parlamentit Evropian. “Që nga viti 1958 kanë qenë gjithsej 183 komisionerë dhe vetëm 35 prej tyre ishin gra. Kjo është më pak se 20%.”
Edhe pse mandati i ri i Komisionit ende nuk ka filluar zyrtarisht, duket se sfida e parë me të cilën do të përballet Presidentja e re e komisionit do të jetë barazia gjinore. Përfaqësimi i grave në Parlamenti Evropian u rrit ndjeshëm pas zgjedhjeve të majit, por sërish postet drejtuese kanë qenë gjithnjë një ekskluzivitet i politikanëve burra. Ndryshimi këtë herë erdhi nga posti më i rëndësishëm në BE dhe pritet për tu parë efekti që zgjedhja e një gruaje në krye të komisionit do të ketë dhe në postet e tjera drejtuese të BE./k.j
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.