Ditën e djeshme nisi punimet sesioni i ri parlamentar, me vëmendjen kryesore të përqendruar te fjalimet përshëndetëse dhe hapëse për sezonin e ri, në një institucion që në thelb duhet të jetë gjithëpërfshirës e përfaqësues.
Gjatë punimeve të seancës plenare, në ambjentet e jashtme të kuvendit, aktivistë të shoqërisë civile dhe përfaqësues të organizatave që merren me fëmijët dhe individët me sindromën down po protestonin kundër gjuhës diskriminuese dhe tërësisht të gabuar që zëvëndës kryetari i Kuvendit Myslim Murrizi ka përdorur në një nga postimet e tij në rrjetet sociale.
Në përgjigje të një komentuesi, zoti Murrizi përdor fjalën down si një ofendim, duke shtuar se i vjen për të vjellë që një individ me këtë sindromë i komenton në postimin e tij.
Me parrullat “Të gjithë të ndryshëm, por njësoj” dhe “Luftoni injorancën tuaj!” aktivistët zhvilluan një protestë duke bërë thirrje për falje publike dhe largimin e Murrizit nga funksioni i deputetit dhe ai i zëvëndës kryetarit të Parlamentit.
Në protestë ishin të pranishëm dhe persona me sindromën down dhe familjarë të tyre.
“Ne gjykojmë që gjuha e përdorur nga deputeti është një praktikë e dëmshme kundrejt komunitetit të personave me aftësi të kufizuara dhe specifikisht personat me sindromën Down dhe familjarëve të tyre pasi nxit diskriminim, urretjen, promovon stereotipet dhe prek dinjitetin e tyre dhe të familjarëve të tyre” thuhej pak ditë më parë në reagimin e Fondacionit “Down Syndrome Albania“ .
Ditën e sotme është nisur dhe mbledhja e firmave në një peticion për shkarkimin e deputetit, ndërkohë që ende nuk ka një falje publike prej tij.
Peticionin mund ta gjeni në lidhjen e mëposhtme:
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.