Eurodeputetja portugeze, Isabel Santos pritet të përzgjedhet raportuese për Shqipërinë në Parlamentin Evropian. Faqja ‘European Western Balkans’ raporton se Santos është nominuar për këtë post dhe vjen si propozim i Aleancës Progresive të Socialistëve dhe Demokratëve (S&D).
Nëse zgjidhet, Isabel Santos do të zëvendësojë në këtë post gjermanin Knut Fleckenstein.
Ajo ka hyrë këtë vit në Parlamentin Evropian dhe më parë ka qenë deputete e Portugalisë. Santos ka qenë një anëtare aktive e delegacionit portugez në Asamblenë Parlamentare të OSBE-së.
Raportuesit e Parlamentit Evropian përgatisin raportet për Komisionin për Politikën e Jashtme për vendet kandidate për anëtarësim në Bashkimin Evropian dhe më pas këto raporte diskutohen në seancat plenare.
Në këtë fazë të procesit të integrimit të Shqipërisë, rolit të raportuesit i jepet një rëndësi më e madhe pasi shtetet anëtare kërkojnë informacion të detajuar për pika të cilat ato i mendojnë si thelbësore në procesin e hapjes së negociatave.
Në parlamentin evropian, Santos është anëtare e komisionit parlamentar për punë të jashtme dhe atij për të drejtat e njeriut. Pozicioni i fundit mund të shërbejë dhe si një shtysë e mëtejshme për vendin tonë, për avancimin më të shpejtë në fushën e të drejtave të njeriut, si një kusht kryesor për hapjen dhe avancimin në procesin e negociatave.
