Në rrugë, në shkollë, në punë apo familje shpesh herë të rinjtë shqiptarë përballen me paragjykimin e lidhur me pamjen e tyre të jashtme. Ngjyra e flokëve, tatuazhet apo shijet e ndryshme në veshje mjaftojnë për të tërhequr shikime ngultazi, të cilat jo në pak raste përbëjnë një barrë të rëndë për personat që i pësojnë.
Ky “çmim” i të qenët ndryshe në disa raste vjen me koston e lartë të të ndjerit keq, izolimit shoqëror dhe vetëvlerësimit të ulët.
All eyes on me “Të gjithë sytë tek unë” është një projekt fotografik i fotoreporteres Loreta Cuka, i cili ka në fokus të rinjtë shqiptarë dhe sfidat e tyre të përditshme të lidhura me pamjen e jashtme dhe paragjykimin shoqëror.
Të gjendur përballë një mentaliteti ende jo të hapur të shoqërisë shqiptare këta të rinj ofrojnë një shembull të dyzuar të guximit për të qenë vetvetja dhe njëkohësisht si persona të paragjykuar dhe të veçuar.
“Pamja ime bën që kudo që shkoj të tërheq vëmendjen e njerëzve, marr disa herë komplimente dhe në raste të tjera edhe komente negative”, tregon një vajzë 21-vjeçare.
“Sfida ime më e madhe lidhur me dëshirën për të eksploruar me ngjyrat e flokëve ka qenë familja. Me familjarët kam pasur shpesh përballje, ende nuk e miratojnë stilin tim, por më kalimin e kohës janë përshtatur”, shton ajo.
“Burrat mbi 60 vjeç më ngatërrojnë shpesh për vajzë, ata e kanë shumë të vështirë të përfytyrojnë një djalë me flokë të gjata, por mua më pëlqen ajo që shoh në pasqyrë,” thotë një tjetër i ri i përfshirë në fotoreportazh.
“Një arsye e fortë e dëshirës sime për të eksperimentuar me ‘look-un’ është përpos shijeve edhe fakti që më kanë ndaluar për një kohë të gjatë të bëj gjërat që dua,” shprehet një 22-vjeçare. “Njerëzit gjatë gjithë kohës më shohin”.
“Përdor më shumë biçikletën për të lëvizur dhe mbaj gjithnjë kufje për të mos dëgjuar të tjerët ndërsa komentojnë ngjyrën time të flokëve dhe tatuazhet,” 21 vjeçe.
“Shtysën për të pasur një pamje të jashtme eksperimentuese ma ka dhënë vetë familja ime, ata janë metal. Në rrugë ndjej shikime që më shënjestrojnë, kryesisht nga gratë në moshë të mesme dhe djemtë mbi 20 vjeç, për këtë ndihem shumë keq.” 20 vjeç.
“Gjatë ditës jam mësuar më shikimet ngultazi, por natën të them të drejtën kjo gjë më frikëson”. 25 vjeçe.
“Në fillim kur bën ndryshime drastike, nuk ke besim tek vetja, plus të tjerët që komentojnë gjithë kohës, por me kalimin e kohës rifiton besimin dhe ndihesh më e sigurt.” 21 vjeçe
Një studim i publikuar në vitin 2017 zbuloi se 1 në 3 fëmijë dhe të rinj janë viktima të bullizmit në Shqipëri, duke shkaktuar stres dhe pasiguri tek ata.
Klikoni te foto për të parë galerinë
[ngg src=”galleries” ids=”1″ display=”basic_slideshow”]
Realizuar nga Loreta Cuka
You may also like
