Duke pranuar që Shqipëria po përballet me një krizë të thellë politike, Partia e Popullit Evropian (PPE) nxit qeverisjen dhe partinë e opozitës të ndërmarrin çdo përpjekje për të kapërcyer krizën përmes dialogut, thekson një rezolutë të paraqitur nga Partia Demokratike e Shqipërisë (PDSH).
Në Kongresin e PPE-së në Zagreb, PD-ja si anëtare e asociuar e kësaj partie evropiane, propozoi rezolutën, e cila u miratua të mërkurën pasdite.
Sipas rezolutës, Partia e Popullit Evropian “mbështet opozitën në Shqipëri në përpjekjet e saj për të adresuar shqetësimet e ligjshme dhe aspiratat evropiane të popullit të Shqipërisë”.
Dokumenti kërkon zbatimin e reformës zgjedhore në përputhje me rekomandimet e OSBE / ODIHR, duke njohur nevojën e vullnetit politik për të arritur kushtet e lira dhe të ndershme.
Rezoluta thekson gjithashtu se veprimet për blerjen e votave dhe përfshirja e krimit të organizuar në zgjedhje është e papranueshme nga standardet evropiane dhe kërkon përparim dhe përfundim të prekshëm në ndjekjen penale me kohë dhe të suksesshme të të gjithë fajtorëve përfshirë politikanët, zyrtarët dhe bandat kriminale të lidhura me blerjen e votave.
Fenomeni i personave me precedentë penalë që kandidojnë për detyra ose emërohen në funksione publike është gjithashtu i kritikuar, dhe Shqipërisë i kërkohet që me shpejtësi të krijojë strukturën e specializuar për të luftuar korrupsionin dhe krimin e organizuar.
Burimi i fotos: Wikimedia
