Shqipëria dhe Maqedonia e Veriut, shtetet më të ndotura në Europë

Ministria e Turizmit dhe Mjedisit prej disa muajsh ka nisur një fushatë që synon pakësimin e ndotjes, kryesisht asaj nga plastika në vend, duke premtuar dhe ndalimin e përdorimit të plastikës një përdorimshme prej 1 Qershorit të këtij viti. Por ndodtja padyshim që shfaqjet në forma të ndryshme dhe plastika është vetëm një element i saj.

Numbeo, ka publikuar Indeksin e Ndotjes për vendet e Europës, dhe në një nivel të përgjithshëm, Shqipëria rezulton si një nga vendet më të ndotura të kontinentit.

Së bashku me Maqedoninë e Veriut dhe Monakon, Shqipëria gjendet në fund të listës përsa i përket ndotjes.

Sipas këtij indeksi, në vitin 2020, Indeksi i Ndotjes në Maqedoninë e Veriut shënoi 80.23 pikë, ndërsa në Shqipëri 77.77 pikë.  Në dy vitet e fundit Indeksi i Ndotjes në Shqipëri ka shënuar përkeqësim. Në fillim të 2018-s ky indeks vlerësohej me 75.2 pikë.

Përsa i përket qyteteve më të ndotura, në vend të parë renditet Tetova, e ndjekur nga Chelyabinski në Rusi, ndërsa Tirana renditet në vendin e tretë, si qyteti më i ndotur i Europës.

Për të gjeneruar këtë indeks, i cili publikohet dy herë në vit, Numbeo përdor të dhënat e mbledhura deri në 36 muaj dhe përfshin vetëm qytete për të cilat ka të paktën një numër të caktuar kontribuesish.

Indeksi i Ndotjes përfshin kryesisht ndotjen e ajrit, e cila ka ngjallur debat kohët e fundit në qytetin e Tiranës dhe ndotjen e ujit, ndërsa u jep një peshë më të vogël llojeve të tjera të ndotjes.

Në 10 vendet më të ndotura pas Shqipërisë renditet Bullgaria me një indeks prej 65.33 pikë, Ukraina me 65.08, Bosnja dhe Hercegovina me 62.33, Serbia me 60.2, si dhe Rumania me 58.2.

Nga ana tjetër vendet me ndotjen më të ulët janë ato të Europës Perëndimore. Vendi më pak i ndotur i Europës është Finlanda, ku sipas Numbeo ka shënuar vetëm 11.55 pikë. Në vend të dytë renditet Islanda  me 16.21 pikë, ndjekur nga Suedia me 18.09 pikë.