27 janari 1945 është dita kur kampi i përqendrimit të Auschwitz, Poloni, u çlirua nga ushtria sovjetike, thuajse tetë muaj përpara mbarimit të luftës së dytë botërore.
Në kujtim të viktimave të genocidit të kryer gjatë luftës së dytë botërore, dita e sotme shënon ndërkombëtarisht Ditën e Përkujtimit të Holokaustit.
Gjatë holokaustit u vranë rreth 6 milionë hebrenj dhe 11 milionë viktima të tjera, kryesisht kundërshtarë politikë, romë dhe homoseksualë.
Dita e sotme shënon gjithashtu dhe përpjekjet bashkëkohore në luftën ndaj urrejtjes dhe anti-semitizmit.
Kujtimet e luftës së dytë botërore, jetojnë ende të gjalla në memorien e të mbijetuarve të kampeve të përqendrimit dhe familjarëve të tyre, ndërkohë që vitet e fundit është vënë re dukshëm një rritje e anti-semitizmit dhe urrejtjes ndaj komuniteteve të ndryshme.
Gjermania dhe shtete të tjera evropiane, po intensifikojnë përpjekjet e tyre për luftimin e anti-semitizmit, me rritjen shqetësuese të numrit të krimeve të urrejtjes vitet e fundit.
Vitin e shkuar, më 9 tetor, vala e krimeve të urrejtes dhe anti-semitizmit arriti kulmin në Gjermani, kur një i ri sulmoi një sinagogë gjatë festimeve për ditën e Yom Kippur në qytetin e Halles, duke vrarë 51 besimtarë.
Ditët e fundit, autoritetet gjermane kanë njoftuar dhe ndalimin e aktiviteteve të disa grupimeve ultra të djathta, që aktivitetin e tyre e bazonin në gjuhën e urrejtjes ndaj hebrenjve.
Aktivitete të ndryshme pritet të mbahen sot në të gjithë botën për të shënuar këtë ditë, ndërsa theksi po rivendoset te përpjekjet për të rikujtuar historinë e për tu siguruar që ajo të mos përsëritet më kurrë.
