Një ditë më parë kryeministri Edi Rama, dhe më pas Ministrja e Infrastrukturës Belinda Balluku kanë njoftuar se nga e shtuna do të nis riatdhesimi i shqiptarëve që kanë mbetur në Itali, për shkak të mbylljes së kufijve.
Por, ky riatdhesim do u kushtoj shumë para të gjithë atyre që duhet të vijnë në vendin e tyre, studentë , punëtorë apo kushdo që dëshiron që të kthehet në shtëpi.
Konkretisht, qeveria njofton se personat përkatës që janë në Itali, dhe dëshirojnë që të vijnë në Shqipëri, duhet të paguajnë vetë biletën e avionit, por e kanë detyrim që të paguajnë edhe hotelin për 14 ditë dhe sigurisht ushqimin dhe gjithҫka që u nevojitet për dy javë sa do të jenë në izolim të plotë, dhe do të ruhen nga policia.
Hoteli do të jetë në një nga hotelet në Durrës, që në kushtet kur nuk kanë asnjë klient për shkak të mbylljes së kufijve kanë pranuar që të kthehen në hotel-karantinë.
“Për të kryer rezervimin e paketës së riatdhesimit tuaj, fillimisht duhet të aksesoni faqen e internetit AIRALBANIA.com.al dhe më pas rubrikën riatdhesime.
Klikoni në linkun e hotelit, për të zgjedhur paketën që ju përshtatet dhe më pas konfirmoni formularin elektronik të kushteve të karantinimit. Ky formular do të firmoset nga ju fizikisht gjithashtu në momentin e lëshimit të bordin pass në sportelet e Air Albanias në aeroportet nga të cilët do të udhëtoni.
Ju lutem lexoni me kujdes kushtet e vendosura në atë formular, pasi nuk do të tolerojmë askënd, që do të thyejë rregullat e vendosura dhe të pranuara, duke vënë në rrezik sigurinë shëndetësore të të gjithë qytetarëve shqiptarë, përpjekjet e secilit prej nesh, në këtë luftë me armikun e padukshëm.”-tha Ministrja Balluku në një dalje të saj në media.
Por, nga ana tjetër që nga fillimi i pandemisë qytetarët shqiptarë kanë hasur problem me riatdhesimet.
Kujtojmë në pikën kufitare të Kakavijës, dhjetëra qytetarë shqiptarë mbetën për ditë të tëra në qiell të hapur, pasi qeveria kishte vendosur rregulla strikte, dhe akush nuk lejohej të hyntë në vendin tonë, duke përjashtuar ata që qeveria i quante “arsye jetike”, arsye këto që nuk konkretizoheshin asnjëherë.
Në lidhje me riatdhesimet, Republika e Maqedonisë së Veriut, ka sjellë në vendin e tyre mijëra qytetarë, që nga fillimi i pandemisë.
Ministri i Jashtëm i RMV, Nikola Dimitrev ka njoftuar se që nga fillimi i pandemisë, janë riatdhesuar 3032 qytetarë të mbetur në vendet e huaja për shkak të mbylljes së kufijve./ HistoriaIme
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.