Në orët e para të mëngjesit të 17 majit, në një akt të paprecedentë kur shumica e institucioneve duhet të ishin në gjumë, në orën 04:00 të mëngjesit me urdhër të Bashkisë së Tiranës, është shembur godina e Teatrit Kombëtar.
Qindra policë bashkiakë, policia e shtetit, forcat e ndërhyrjes së shpejtë, Forcat Speciale, policë civilë, kanë rrethuar ambientet e Teatrit, duke nxjerrë zvarrë artistët që për 2 vite e gjysmë protestojnë kundër shembjes së godinës.
Gjatë gjithë ditës së diele, aktivistë të shoqërisë civile, artisë, të mbështetur edhe nga opozita, kanë protestuar në Bulevardin Dëshmorët e Kombit, dhe janë përleshur me policinë.
64 persona janë shoqëruar të dielen, 7 policë të plagosur, 7 të arrestuar dhe 21 të proceduar, është bilanci sipas një njoftimi të policisë së Tiranës të Hënën. policia e Tiranës, qartasi mohon dhunën e ushtruar nga policia e Shtetit dhe forcave speciale, pa numra identifikues, e me maska, për ta bërë të pamundur identifikimin e atyre që kanë ushtruar dhunë ndaj qytetarëve.
” Gjatë kryerjes së detyrës, forcat e Policisë janë kundërshtuar me dhunë nga persona që ishin grumbulluar për të mos lejuar prishjen e godinës, duke tentuar që të pengonin autoritetet në zbatimin e vendimit.
Disa persona nga radhët e tubuesve kanë qëlluar herë pas herë në drejtim të forcave të Policisë, me sende të forta dhe shkopinj, duke lënduar 7 punonjës policie në detyrë. Punonjësit e lënduar janë efektivë të Patrullave të Përgjithshme dhe të forcës së posaçme “Shqiponja”. Ata kanë marrë ndihmën e parë në spitalin e Traumës dhe spitalin “Nënë Tereza” dhe janë jashtë rrezikut për jetën.”-thotë policia.
Ekzistojnë qindra minuta video, foto të dhimbshme që kanë bërë xhiron e rrjetit, dhe përleshje të mëdha, që dëshmojnë qartasi dhunën që ka ushtruar policia ndaj protestuesve, një dhunë kjo në disproporcion me reagimin qytetar.
Nga ana tjetër, Grupi Shqiptar për të Drejtat e Njeriut në një deklaratë ka për media, hedh poshtë pretendimet e policisë duke thënë: ‘ I riu Mendi Zavalani tregon për GSHDNJ dhunën e rëndë të forcave të policisë që arriti në të gdhirë të kësaj të diele, veshur me uniforma të zeza dhe me maska. Më shume se katër policë e goditën me forcë dhe shumë herë në kokë Zavalanin, duke i çarë veshin dhe duke e dëmtuar në sy. “
” Sjellja e qeverisë shqiptare dhe e policisë është në kundërshtim me misionin e tyre, që ka për detyrë të mbrojë shtetin e së drejtës dhe të jetë mbështetje dhe siguri për qytetarët.”-vijon deklarata.
Çdo person që ka qenë dje në shesh, dhe çdo person që i ka ndjekur me vëmendje materialet filmike, është i qartë mbi atë që ka ndodhur në mes të Bulevardit Dëshmorët e Kombit një ditë më parë.
Policia pretendon që ushtruesit e dhunës kanë qenë protestuesit, ndërsa në materialet e mediave nuk është parë asnjë polic i shtrirë në tokë, por janë parë dhjetëra aktivistë e qytetarë në gjendje të rëndë.
Për më tepër, në materialet më poshtë, foto e video, mund të shihni qartë se kush ishin ushtruesit e dhunës së 17 majit./ HistoriaIme
Foto te tjera mund ti shikoni ne linkun: facebook.com
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.