Një raport alarmant është publikuar nga Instituti i Politikave Evropiane të Kosovës, bazuar në të dhënat zyrtare të EUROSTAT.
Sipas këtij raporti, mbi një milion shqiptarë, ose 44% e popullsisë së përgjithshme aktuale të vendit, migruan në Shtetet Anëtare të BE-së nga viti 2008 deri në 2018, duke e bërë Shqipërinë vendin kryesor të Ballkanit Perëndimor të origjinës për migrantët në BE.
1.249.706 shqiptarë u larguan nga vendi për në Shtetet Anëtare të BE-së, brenda një dekade (2008-2018). Ky numër arrin në 44% të popullsisë së përgjithshme të vendit në vitin 2019.
Nga këto, 451.015 shtetas shqiptarë, ose 16% e popullsisë së përgjithshme, u konstatua se ishin të pranishme ilegalisht në BE gjatë kësaj periudhe, më shumë sesa qytetarët e të gjitha vendeve të tjera të Ballkanit Perëndimor të llogaritur së bashku.
Numrat e migracionit në Shqipëri në proporcion me popullsinë e saj janë në kontrast të ashpër me ato të Kosovës (30%), Malit të Zi (6%), Maqedonisë Veriore (12%), Serbisë (8%) dhe Bosnje-Hercegovinës (9%).
Meqë përfundimet e raportit bazohen vetëm në numrin e kërkesave për azil, qytetarët që zbulohet të jenë prezent ilegalisht në BE, dhe lejet e qëndrimit të lëshuara, numri aktual i migrantëve mund të jetë edhe më i madh. Gjithashtu, këto numra nuk japin llogari për shqiptarët që kanë emigruar në vendet jashtë BE-së, përfshirë SHBA dhe Kanada./ HistoriaIme
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.