Neni 8 i Konventës Ndërkombëtare për Mbrojtjen e të Drejtave dhe Lirive Themelore të Njeriut, si dhe Kushtetuta e Republikës së Shqipërisë garantojnë të drejtën e çdo qytetari për mbrojtjen e jetës private.
Tanimë me mënyrën e re të jetesës, në kushtet e koronavirusit, shumë nga punët që bëheshin më parë nga zyra, sot bëhen në shtëpi.
Por vendimi i fundit i kompanisë gjigande të Call-Centerave, Teleperformancë, është duke u konsideruar skandaloz.
Kompania ka kërkuar nga punëtorët, që të instalojnë kamera në hapësirat e shtëpisë, për të monitoruar ambjentet nga ku ato punojnë.
Ky vendim është cilësuar si skandaloz nga punonjësit dhe sindikata, pasi instalimi i kamerave në ambiente private ndalohet edhe me ligj, dhe qartasi është cënin i privatësisë së individëve.
Deklarata e Sindikatës së Call-Center-Ave, Solidariteti!
JO KAMERAVE NË DHOMËN E GJUMIT!
JO PËRGJIMEVE NË SHTËPI!
Ditëve të fundit qindra operatorë të kompanisë Teleperformance janë përballur me një vendim skandaloz të kësaj të fundit, e cila iu kërkon atyre instalimin e kamerave në hapësirat private të shtëpisë, prej ku ata punojnë që nga fillimi i pandemisë. Pas firmosjes së kontratës WAHA (Work At Home Agent), punëtorëve iu është dhënë njoftimi se kompania do iu kërkojë atyre instalimin e kamerave në hapësirat private nga ku ata do punojnë.
Siç shprehet një pjesë e madhe e punëtorëve, atyre iu mungojnë hapësirat e veçanta për punë në shtëpitë e tyre. Kjo bën që një pjesë e madhe e tyre pajisjet e punës t’i kenë të vendosura në ambiente të përbashkëta me anëtarë të tjerë të familjës, siç mund të jenë dhomat e gjumit, sallonët e ndejtjes etj.
Vendosja e kamerës në një ambient të tillë cenon jo vetëm privatësinë e punëtorit, por edhe të të gjithë familjes së tij. Një veprim i tillë është skandaloz dhe i papranueshëm.
Sipas kompanisë një gjë e tillë duhet të bëhet për të mbikëqyrur punën dhe për të siguruar ruajtjen e të dhënave të klientit.
Asnjëri nga këta argumenta nuk qëndrojnë. Së pari, mbikëqyrja e procesit të punës bëhet plotësisht dhe pa asnjë mangësi përmes sistemeve të brendshme dhe software-eve të posaçme. Së dyti, në emër të ruajtjes së privatësisë dhe të dhënave të klientit, po shkelet me të dyja këmbët privatësia e punëtorit dhe e familjarëve të tij. E pavarësisht kësaj, instalimi i kamerës në tavolinën e punës nuk garanton asnjëlloj sigurie të të dhënave të asnjërës palë.
Ky veprim po kundërshtohet tashmë nga pjesa më e madhe e operatorëve. Sindikata Solidariteti ka ndjekur të gjitha procedurat e parashikuara me ligj dhe iu është drejtuar të gjithë institucioneve përkatës. Gjithashtu, ne i kemi kërkuar kompanisë që të fillojë diskutimet me përfaqësuesit e Sindikatës dhe ta pezullojë një proces të tillë, i cili ndër të tjera është dhe i paligjshëm.
Neni 8 i Konventës Ndërkombëtare për Mbrojtjen e të Drejtave dhe Lirive Themelore të Njeriut, si dhe Kushtetuta e Republikës së Shqipërisë garantojnë të drejtën e çdo qytetari për mbrojtjen e jetës private.
Udhëzimi Nr.3 i datës 05.03.2010, i cili i referohet Ligjit Nr. 9887, shprehet qartë se vendosja e kamerave në hapësira private është e ndaluar.
Për ta fituar këtë betejë, në mbrojtje të dinjitetit të punëtorëve, duhet që të bëhemi sa më shumë dhe të jemi të bashkuar. Ftojmë të gjithë punëtorët e kompanisë Teleperformance, por edhe të gjithë punëtorët e sektorit call center, që të anëtarësohen te Sindikata Solidariteti dhe bashkë me qindra e mijëra të tjerë si vetja ta fitojmë këtë betejë dhe të tjerat./Historiaime
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.