Dhuna dhe arrestimt nga policia në protesta/ Këshilli i Europës reagim të ashpër ndaj autoriteteve shqiptare

Autoritetet shqiptare duhet të jenë të përmbajtur në menaxhimin e demostratave dhe të sigurojnë hetime të hollësishme, të pavarura dhe efektive për të gjitha pretendimet e përdorimit të tepruar të forcës.

Kështu është shprehur komisioneria e Këshillit të Evropës për të Drejtat e Njeriut, Dunja Mijatoviç, në një deklaratë të bërë ditën e sotme rreth protestave të mbajtura ditëve të fundit në Shqipëri për vrasjen e Klodian Rashës, protesta këto që janë kritikuar masivisht për shkak të aksioneve të policisë së Shtetit.

Në një deklaratë të publikuar në faqen zyrtare të KiE, shprehet shqetësimi për “përshkallëzimin e përplasjet midis policisë dhe protestuesve.”

“Përdorimi jo-proporcional i forcës është raportuar gjithashtu në lidhje me demonstrata të tjera që u zhvilluan në Shqipëri në fillim të këtij viti” shton deklarata..

“Përgjigja ndaj pandemisë COVID-19 nuk u jep autoriteteve lirinë për të përdorur forcë kur mblidhen njerëzit”, thotë Komisioneria.

Dunja Mijatoviç shprehet se policia duhet të bëjë dallimin midis individëve të përfshirë në dhunë dhe atyre që demonstrojnë në mënyrë paqësore, si dhe shtohet më tej, të përmbahen nga përdorimi i rëndë ose pa kriter i forcës.

“Ndërsa e drejta për tubim paqësor mund të kufizohet për të mbrojtur shëndetin publik, autoritetet duhet të mbështesin parimet e domosdoshmërisë dhe proporcionalitetit në të gjitha rrethanat. Prandaj, ndalimet grumbullimeve dhe shpërndarja e demonstratave për të vetmen arsye se ato po shkelin rregullat e bllokimit, pa marrë në konsideratë masa më pak kufizuese, duhet të shmangen. Policia duhet gjithashtu të bëjë dallimin midis individëve të përfshirë në dhunë dhe atyre që demonstrojnë në mënyrë paqësore dhe të përmbahen nga përdorimi i rëndë ose pa kriter i forcës. Për më tepër, çdo ndalim i fëmijëve duhet të kryhet vetëm si një masë e fundit dhe duhet të respektojë plotësisht të drejtat e tyre procedurale, duke përfshirë të drejtën për t’u pyetur vetëm në prani të një avokati ose njërit prej prindërve ose kujdestarëve të tyre.”

 “Është thelbësore që të sigurohet që oficerët e policisë që veprojnë në kontekstin e demonstratave të marrin trajnim të specializuar në menaxhimin e negociuar të mbledhjeve dhe përdorimin proporcional të forcës.”-shkruhet në deklaratë më tej.

Komisioneria shpreh shqetësimin edhe për ndalimin dhe sulmet e pretenduara ndaj, disa gazetarëve që mbulojnë demonstratat.

“Sulmet ndaj gazetarëve përbëjnë një shkelje serioze të lirisë së shtypit dhe të drejtës për tu informuar. Autoritetet duhet të sigurojnë që gazetarët mund të vazhdojnë të informojnë qytetarët pa frikë nga kërcënimet ose aktet e dhunës”.



Mijatović thekson se veshja e etiketave të dukshme të identifikimit nga punonjësit e policisë, ndihmon në sigurimin e përgjegjësisë.  / HistoriaIme