Historike/ Një minator, kandidat për deputet në Shqipëri!

Në zgjedhjet e përgjithshme të 25 prillit, për herë të parë në vendin tonë do të marrë pjesë edhe një punëtor sindikalist.

Kreu i Sindikatës së Minatorëve të Bashkuar të Bulqizës, Elton Debreshi ka shpallur kandidaturën e pavarur për të përfaqësuar gjithë Qarkun e Dibrës, në veçanti punëtorët në vend, të cilët po përballen me sfida jo të vogla. 

Debreshi i cili prej vitesh jeton në Bulqizë, ishte një nga organizatorët kryesorë të organizimit punëtor të minatorëve në Bulqizë, të cilët kanë kërkuar vazhdimisht kushte më dinjitoze pune nga kompanitë menaxhuese të minierave.
Ai synon të sjellë më afër kauzën e punëtorëve me politikën dhe të ndërgjegjësojë dhe qytetarët për vështirësitë e krizës sonë së përfaqësimit.

Kandiaturën e tij, e kanë mbështetur fort dhe grupime të tjera sindikaliste dhe organizata të majta me fokus punëtorët, si Organizata Politike.

Janë mbledhur mbi 11 mijë firma të nevojshme për kandidimin e Debreshit, i cili po hyn në histori si sindikalisti i parë që kandidon në zgjedhje parlamentare në Shqipëri.

Një nga qëllimet e tij, është zgjidhja e problemit të statusit të minatorit. Në njoftimin e komitetit mbledhës së firmave për Debreshin, shkruhet se: “Përtej peticionit të dorëzuar përpara 30 ditësh, problematika e Statusit të Minatorit vazhdon prej 30 vjetësh. Asnjëra nga partitë dhe qeveritë që kanë drejtuar vendin, si dhe qindra e më shumë deputetët që kanë ngrohur karriget në këto tre dekada, nuk kanë menduar as për minatorët e as për Statusin. Kushtet tona veçse janë përkeqësuar.”

Grupimi mbështetës sjellë në vëmendje dhe problematikat e profesionit të minatorit dhe vështirësitë e punës, si një alternativë zgjedhjeje për të gjithë punëtorët e papërfaqësuar në parlament.

“Mbështetja e një minatori si kandidat i pavarur për deputet është mënyra më e mirë për ta vendosur çështjen e Statusit në qendër të vëmendjes dhe në zemër të fushatës zgjedhore. Një minator në Parlament do të ishte garancia që të drejtat tona nuk do të nëpërkëmben më tej, që zëri i minatorit nuk do të vijojë të mbytet njëlloj si jetët tona. Statusi i Minatorit, përpjekja e madhe e mohuar pafundësisht, do të jetë kryefjala në çdo hap të kësaj rruge.”

Mbështetja e Elton Debreshit është e gjerë në rradhët e minatorëve dhe organizimi i udhëhequr prej tij u përpoq të shtypej, duke larguar dhe Eltonin nga vendi i punës. Sërish, si thuhet dhe në njoftimn zyrtar, ai nuk është tërhequr në asnjë moment, por ka vazhduar me vendosmëri përpjekjen në mbrojtje të të drejtave të minatorëve.

Jemi të bindur që këtë vendosmëri, guxim dhe ndershmëri do ta vazhdojë edhe në këtë rrugë të re e të vështirë.

Mbyllet njoftimi i grupit mbështetës së Elton Debreshit për kandidat për deputet në zgjedhjet e ardhshme. / A.Alikaj