Peter Handke merr Nobelin mes bojkotit e protestave

Ditën e djeshme në Stokholm u zhvillua ceremonia e dhënies së çmimit Nobel për Peter Handke, fitues në fushën e letërsisë. Dhënia e çmimit u shoqërua me një valë protestash dhe bojkoti, pasi Handke është mohues i krimeve në Bosnje dhe përkrahës i ish-presidentit serb Sllobodan Millosheviç.

Ai ka mbajtur dhe fjalim në vitin 2006 në funeralin e ish-presidentit serb, i cili vdiq në Hagë kur po gjykohej për krime lufte dhe gjenocid.

Bosnja dhe Herzegovina, Kosova, Shqipëria, Maqedonia e Veriut, Turqia dhe Kroacia instruktuan ambasadorët përkatës në Stokholm të bojkotojnë ceremoninë në shenjë proteste për qëndrimet e Handke mbi krimet e luftës në Bosnje.

Shoqatat e viktimave të luftës në Bosnje, vendosën një ekran gjigant elektronik në qendër të Sarajevës, duke portretizuar laureatin e çmimit Nobel për letërsinë, Peter Handke, si një djall që qëndron pranë kafkave, me një mesazh ku thuhet “turp të keni”.

Në Stokholm, grupe protestuesish vendosën slogane si “Jo Nobel për lajme të rreme”, dhe thirrje “Handke kërko ndjesë për viktimat e Srebrenicës!”.

Ndërkohë dhe ish-nobelistë kanë reaguar mbi dhënien e Nobelit në Letërsi për Handken. Christina Doctare, një mjeke suedeze, e cila ishte pjesë e ekipit Forcave Paqeruajtëse të Kombeve të Bashkuara që fituan çmimin Nobel për Paqe në vitin 1988, tha se do t’ia ktheje çmimin Akademisë Mbretërore Suedeze për shkak të turpit që ky çmim mban tashmë mbi vete.

Peter Handke refuzoi javën e kaluar t’u përgjigjej pyetjeve në lidhje me mbështetjen e tij për Sllobodan Millosheviçin, në një paraqitje në Stokholm.

Për më tepër, një numër i konsiderueshëm i gazetarëve të njohur që mbuluan mediatikisht Bosnjën gjatë luftës, kanë kundërshtuar ceremoninë e Nobelit, duke riafirmuar të vërtetën e gjenocidit që Handke mohon.
Këta gazetarë përfshijnë Christiane Amanpour të CNN dhe Samantha Power, ish ambasadorja amerikane në Kombet e Bashkuara, që e mbuluan luftën në vitet 1990 si një gazetar të pavarur.

Burimi i fotos: AP