Rëndohet gjendja e grevisteve, njëra tenton vetëvrasjen

Greva e grave naftëtare është futur në ditën e saj të 24, ndërsa gjendja shëndetësore e grave greviste sa vjen e rëndohet.

Prej disa ditësh, gratë marrin ndihmën e nevojshme mjekësore dhe rikthehen në grevë, ndërsa gjendja psikologjike e tyre është rënduar aq shumë, sa një prej grevisteve ka tentuar vetëvrasjen, por fatmirësisht u ndalua nga shoqet.

Mësohet se bëhet fjalë për grevisten M.M, e cila ka punuar në Uzinën e Naftës për 36 vite.

Gratë duke përsëritur thirrjet për reagim, pohojnë se janë të pa shpresa dhe se ndihen të braktisura nga autoritetet.

Ato shprehën së fundmi kritika edhe për presidentin Meta, i cili ishte një ditë më parë në Bylis, por nuk ndaloi të takonte gratë greviste.

Gjendja e rëndë shëndetësore është vënë re dhe në prononcimet e tyre të fundit për mediat, ku të dëshpëruara ato kërkojnë zgjidhjen e problemit të tyre për tu rikthyer sërish në familje./HistoriaIme