Punesimi  / SLIDER BALLINA  / Te Drejtat e Njeriut

Vit i Ri dhe hesape të vjetra për minatorët e Bulqizës

Liri Kuçi Posted On 06/01/2020

Ka nisur një vit i ri kalendarik dhe fantazma e 2019-tës, ende vërtitet në ngjarjet e reja ende të papërvijuara mirë të 2020-tës. Çka është vënë re në komunitetin e vogëlth të facebookut, – të paktën të rretheve të aktivizmit dhe të drejtave të njeriut, i cili duket se ngushtohet progresivisht kur vjen puna te disa shkelje-  nuk mund të ngelet pa përmendur, se ngjarjet që kanë pasuar shpalljen e Sindikatës së Minatorëve të Bashkuar të Bulqizës, – ndonëse më të rëndëishmet së paku në 10 vitet e fundit, sa i përket sektorit minerar dhe organizimit punëtor,- kanë patur si barrierë terrin mediatik (lexo më shumë).

Që prej themelimit të sindikatës, aktivistët  e Organizatës Politike, të cilët kanë qenë përkrah minatorëve dhe të pranishëm në organizimet e tyre, nga procedurat ligjore, deri te greva 10-ditore, kanë intensifikuar edhe në Tiranë veprimtarinë për mediatizimin dhe informimin në lidhje me situatën në Bulqizë. Graffitit që kanë mbushur muret  e Tiranës, dënojnë pronarin e Albchrome, njëkohësisht dhe njeriun më të pasur të Shqipërisë Samir Manen, për pushimin nga puna të Elton Debreshit, Beqir Duricit, Behar Gjimit dhe Ali Gjetës, si dhe kërcënimin e dhjetra sindikalistëve të tjerë.

 “Samir Mane vjedh shqiptarët / shtyp minatorët / shtyp punëtorët”, ishin disa prej shkrimeve me të cilat u gdhi Tirana e datës 20 dhjetor, të cilat u duk se patën mobilizuar gjithë punëtorët e pastrimit të porositur me urdhër nga lart, për t’i fshirë.

Sakaq, aktivitetet e tjera vijuan me shpërndarjen e fletushkave për të bojkotuar bizneset e Samir Manes, duke sjellë vëmendjen në situatën kritike të minatorëve të Bulqizës, u hapën edhe banderola gjigande në kryqëzime rrugësh të rëndësishme, si dhe në taracën e ndërtesës së Teatrit të Operas dhe Baletit. Ndërsa së fundmi, teksa aktivistët shpërndanin fletët informuese në një prej bizneseve më të mëdha në pronësi të të sipërmendurit, në qendrën tregëtare Tirana East Gate (TEG), 7 aktivistë u shoqëruan në komisariatin e policisë, teksa 3 prej tyre u mbajtën në paraburgim për plot 3 ditë. Akuzat ishin të sajdisura në të atillë formë, ku qartazi dukej se arsyeve politike të arrestimit të aktivistëve, nuk u gjendej dot një justifikim ligjor më i mirë. Në tubimin e gjyqit të aktivistëve morën pjesë edhe minatorët e pushuar nga puna, ku shprehën mbështetjen për aktivitetin e organizatës dhe aktivistëve jo vetëm më praninë e tyre, por edhe në fjalimet që mbajtën tre prej sindikalistëve të pushuar nga puna, Elton Debreshi, Beqir Durici dhe Behar Gjimi.

Mirëpo, edhe pas lirimit të tyre, Organizata Politike ka vijuar me aksionet me graffiti në muret e pashkruara dhe të pafshira ende. Teksa aktivistët u kujdesën që të rishkruajnë parullën “Samir Mane shtyp punëtorët e Bulqizës” pikërisht në qendrën sociale “Logu i Shkëndijës”, në murin e sterrosur prej punonjësve të bashkisë ose më keq akoma – të të porositurve drejtpërdrejt nga Samir Mane – u arrestua një tjetër aktivist. Në datën 31 dhjetor, teksa afërmendsh njerëzit duhet të ishin pranë familjeve të tyre në ndërrimin e motmoteve, policia e shtetit dhe/apo rojtarët e rendit ekzistues oligarkik, nuk ngurruan të na tregojnë se policimi i jetës dhe aktivitetit shoqëror është gjithnjë vigjilent në kujdesin e ruajtjes së status-quosë.

Duket se ky Vit i Ri, do të mbartë dhe do të rrisë me kujdes pjellën e ngjizur me fanatizëm në vitet e ashtuquajtura “të demokracisë”, që përjetoi Shqipëria – përbindëshin censurë, frikën dhe dhunën. Kështu, për minatorët e pushuar nga puna dhe aktivitetin sindikalist të tyre, Viti i Ri ka nisur pa larë hesapet e vjetra. Sindikata e Minatorëve të Baskuar të Bulqizës vazhdon paepur aktivitetin e saj deri në rikthimin në punë të minatorëve të pushuar dhe plotësimit të kërkesave të tjera (lexo më shumë). Po njësoj duket se vijon dhe aktivisteti dhe mbështetja e aktivistëve të Organizatës Politike bashkë më ta në Bulqizë, paralelisht me ta në Tiranë dhe lipset mobilizimi i mbarëshoqërisë deri në fitore.

Liri Kuçi

Punesimi  / SLIDER BALLINA  / Te Drejtat e Njeriut

Labour Start në solidaritet me sindikatën e Bulqizës – nis peticion ndërkombëtar

Liri Kuçi Posted On 16/12/2019

Prej gati një jave, aktivistë të sindikatave punëtore në botë, të cilët kanë ndjekur zhvillimet dhe represionin e ushtruar nga kompania Albchrome ndaj sindikatës së minatorëve të Bulqizës, kanë ndërmarrë një peticion nëpërmjet “Labour Start”, kundër nëpërkëmbjes së vazhueshme dhe shkeljeve ndaj kërkesave të punëtorëve. “Labour Start”, është një platformë mediatike, e mbështetur nga një rrjet botëror vullnetarësh, nëpërmjet së cilës synohet jo vetëm shëkmbimi i informacioneve në lidhje me kauzat dhe organizimin punëtor, por edhe mbështetja e tyre nëpërmjet fushatave online dhe nxitja e hapave të tjerë të nevojshëm solidarizues.

Nën titullin “Albania: Solidarity with the miners – end repression now”, është çelur fushata, e cila tashmë vazhdon të qëndrojë e hapur prej një jave, duke bërë thirrje për solidaritet dhe mbledhjen e sa më shumë firmave në mbështetje të kauzës së minatorëve të Bulqizës.

Në solidaritet me Sindikatën e Miniatorëve të Bashkuar të Bulqizës, bashkimit të parë demokratik të punëtorëve të minierave, të pavarur nga partitë politike dhe punëdhënësit në Shqipëri, “Labor Start” thekson siç vijon:

Liria e organizimit dhe kontratat kolektive janë të drejta themelore të mbrojtura nga konventat kryesore të Organizatës Ndërkombëtare të Punës (ILO) Nr. 87 dhe 98. Që nga ratifikimi i tyre mbi gjysmë shekulli më parë, këto të drejta janë përfshirë në ligjin shqiptar.

Ne kërkojmë që qeveria e Shqipërisë dhe Albchrome të respektojnë standardet ndërkombëtare të punës dhe të respektojnë ligjin shqiptar që mbron të drejtën e minatorëve në Bulqizë për të krijuar sindikata të lira, demokratike dhe të pavarura, të afta të negociojnë për paga të drejta dhe punë në kushte të dinjitetshme. Ndal shtypjes ndaj punëtorëve që ushtrojnë të drejtën e tyre për lirinë e organizimit, rikthimi në punë i kryetarit dhe sindikalistëve të tjerë dhe të fillojnë negociatat e vërteta kolektive me punëtorët dhe sindikatën e tyre.”

Kjo fushatë do të zgjasë derisa të mblidhet një numër i konsiderueshëm firmash, për të vazhduar edhe më pas me mekanizmat e presionit ndërkombëtar, deri në afrimin e zgjidhjes përfundimtare të problemit të sindikatës në Bulqizë. E derisa, të bëhet i mundur funksionimi normal dhe i lirë i veprimtarisë së SMBB-së në përputhje me legjislacion vendor dhe ndërkombëtar, duket se do të jetë një rrugë e gjatë përpara deri në zbatimin e konventave të miratuara në letër, por të mohuara në bazë të ligjit të më të fortit.

Punesimi  / SLIDER BALLINA  / Te Drejtat e Njeriut

Reportazh nga Bulqiza – Themelohet Sindikata e Minatorëve të Bashkuar

Liri Kuçi Posted On 18/11/2019

Sektori minerar është një ndër sektorët që provon problematikat më të mëdha në vend,  jo vetëm sa i përket vështirësisë, mungesës së sigurisë në punë, por edhe në lidhje me organizimin punëtor.

Miniera e Bulqizës është një ndër më të pasurat në rajon, por historikisht ka rënë pre e aferave korruptive të politikave okulte dhe përfitimeve të ngushta pushtetare, privatizimeve dhe koncesioneve. Duke luajtur kësisoj fijet midis pushtetit, pronarëve dhe privatëve, punëtorët e minierave e kanë pasur të vështirë organizimin mes vete, ngritjen dhe zgjidhjen e problemeve të të drejtave në punë, si çështjet e sigurisë të cilat janë ato më të vështirat, deri te paga, apo represioni i ushtruar së lartmi vazhdimisht. Kështu dhe marrëdhëniet me sindikatën, kanë qenë të përvijuara brenda linjave të mësipërme, duke bërë që punëtorët ta kenë të vështirë adresimin e të drejtave të tyre dhe avancimin në organizim, pasi sindikata reshti së qeni përfaqësuese e punëtorëve.

Të pakënaqur nga mospërfaqësimi sindikal, javët e fundit mësuam se një sindikatë e re u themelua në mesin e minatorëve të Bulqizës, e cila kaloi një sërë peripecish e zvarritjesh burokratike deri në njohjen zyrtare të statusit të sindikatës së quajtur “Sindikata e Minatorëve të Bashkuar të Bulqizës“.

Më 17 nëntor, ditën e diel në Bulqizë u bë shpallja publike e kësaj sindikate, shoqëruar me një tubim të madh në sheshin e qytetit të Bulqizës. Manifestimit të minatorëve, iu bashkuan dhjetra aktvistë të Organizatës Politike nga Tirana, të cilët ndihmuan minatorët dhe në organizimin e aktivitetit.

Sheshi u mbush me dhjetëra minatorë aktualë dhe pensionistë, sindikalistë të anëtarësuar dhe qytetarë të interesuar për sindikatën e re dhe të pavarur të minatorëve. Lajmi u prit me entuziazëm te të pranishmit, ku në një tavolinë ndaj shkallëve të sheshit qytetas u firmosën dhjetra formularë anëtarësimi nga punëtorët e minierave. Fjalimi i kryetarit të sindikatës Elton Debreshi, i cili u zotua përpara të gjithëve për detyrën e vështirë dhe pasionin e ndershmërinë për ta çuar përpara, ndezi duartrokitje dhe brohorima mbështetëse nga të pranishmit. Gjithaq, pati fjalime të ndjera edhe nga minatorët e tjerë, sindikalistë dhe jo sindikalistë që nënvizuan rëndësinë madhore të këtij organizimi historik të pavarur të punëtorëve, duke i veshur shpresë dhe pritshmëri të larta aktiviteteve që do të ndërmerreshin nga vetë punëtorët. Avokatja Holta Ymeri, e cila ka punuar me përkushtim masimal deri në finalizimin e procedurave ligjore në njohjen e sindikatës, në fjalën e saj përshkroi jo vetëm odisenë ligjore, por edhe rëndësinë madhore të organizimit punëtor të pavarur dhe të strukturuar në zgjidhjen e problemeve reale në punë.

Përveç qytetarëve të Bulqizës, themelimin e sindikatës e përshëndetën dhe aktivistë të Organizatës Politike, që e cilësuan historike ditën e 17-nëntorit sindikalist të minatorëve bulqizakë. Ata theksuan ndër të tjera, se kjo sindikatë do të frymëzojë jo vetëm organizimin e sektorëve të tjerë në Bulqizë, por edhe punëtorët në të gjithë Shqipërinë. Foli edhe Albjoni, sindikalisti dhe minatori më i ri ndër pjesëmarrësit; vetëm 22-vjeç, i cili tregoi se kishte 4-vite  duke punuar në nëntokë dhe se qysh prej atëherë kishte braktisur studimet, pasi duhet të ushqente familjen. “Ne nuk jemi njerëz të letrave, por të punës”- shtroi disa herë Albjoni gjatë fjalimit të artikuluar aq mirë dhe që ndezi zemrat e rrëmbushi sytë e të pranishmëve në manifestim. “… ëndërroj ama, që sa kohë të punoj në minierë, të fitojmë të drejtat tona dhe të organizohemi pa frikë, ndonëse dëshiroj me gjithë shpirt që një ditë t’u rikthehem studimeve dhe të nis shkollën e lartë”, vijoi Albjoni bisedën pas tubimit në shesh, si të kish’ lënë diçka përgjysmë nga fjala e thënë përpara shokëve minatorë.

“Vërtet që miniera e Bulqizës nxjerr të ardhura sa për të pasuruar të gjithë Shqipërinë, por në anën tjetër, as bulqizakët vetë nuk po ia shohin hajrin asaj të shkrete, sa duket sikur po prodhohet bukëpeshku dhe jo krom,” tha Sami Curri, i riu nga Bulqiza dhe me punë në Tiranë, i cili jo vetëm moderoi takimin, por edhe ka ndihmuar minatorët qysh prej fillimit në organizimin sindikal. “Por, siç e dëgjuat prej vetë sindikalistëve, që sot e tutje ju  dhe vetëm ju  do të jeni përgjegjësit e funksionimit të sindikatës, suksesit apo dështimit të saj, prandaj rroftë sindikata dhe minatorët!” mbylli fjalën e tij me entuziazëm  Samiu, duke marrë duartrokitje të gjata nga minatorët.