Shqipëria voton! Pjesëmarrje e lartë deri në orën 10:00

Ditën e sotme, qytetarët shqiptarë po i drejtohen kutive të votimit, për të zgjedhur përfaqësuesit e tyre në parlament për legjislaturën e ardhshme.

Procesi zgjedhor ka nisur normalisht dhe përpos disa vonesave dhe problemeve teknike me instalimin e pajisjeve të identifikimit elektronik, po vijon normalisht në mbi 5199 qendra votimi në të gjithë vendin.

Deri në orën 10:00 kanë votuar 16.67% e qytetarëve.

Një pjesëmarrje kjo më e madhe se në zgjedhjet e kaluara të vitit 2017, kur pjesëmarrja deri në orën 10:00 arrinte në 14.89%.

Pjesëmarrja më e madhe shënohet në qarkun e Tiranës, ndërsa më e ulta në Vlorë.

Prej pandemisë, numri i vëzhguesve ndërkombëtarë në këto zgjedhje është më i ulët, por për misionin e ODHIR, rëndësi nuk ka vetëm dita e zgjedhjeve, por i gjithë procesi në tërësi.

Sipas drejtueses së këtij misioni, ambasadores Ursula Gacek, ODHIR po monitoron me ekipet e tij të gjithë procesin, që prej datës 17 mars.

“Jam në Shqipëri prej datës 17 mars. Gjitha vëmendja i dedikohet ditës së zgjedhjeve, po për ne si mision është vetëm një pjesë. Fokusi i vëzhgimit të fushatës në tërësi, paregullsitë gjatë saj, sjellja e kandidatëve.”, deklaroi Gacek gjatë një prononcimi për mediat.

Aktivistë të shoqërisë civile dhe organizmat ndërkombëtarë kanë bërë thirrje për pjesëmarrje në kvto zgjedhje, të cilat janë të një rëndësie të vecantë për procesin e integrimit të Shqipërisë në BE.

Në lidhje me përfshirjen e komunitetit LGBTI+ në këto zgjedhje, Aleanca LGBT dhe Pro-LGBT, kanë zhvilluar monitorimin e tyre të programeve politike dhe fushatës zgjedhore, për të evidentuar kandidatët mbështetës dhe ato të cilët kanë dalë shpeshherë hapur kundër të drejtave të komunitetit LGBTI+.

Duke inkurajuar pjesëmarrjen e komunitetit LGBTI+ në këto zgjedhje, por dhe të të gjithë grupeve të tjera të nën-përfaqësuara në shoqëri, vlen të rikujtojmë listën e kadidatëve në këto zgjedhje. Një pjesë e madhe e tyre nuk kanë qëndrim zyrtar mbi komunitetin, por lista në vijim mund të ndihmojë personat e komunitetit LGBTI+ me zgjedhjen e tyre.

Kandidatët në listën e gjelbër, kanë bashkëpunuar në të shkuarën me komunitetin LGBT+, kanë qenë mbështetës ose janë zotuar për të mbështetur komunitetin në legjislaturën e ardhshme.

Kandidatët në listën e kuqe janë shprehur publikisht kundër të drejtave të komunitetit LGBT+, ose kanë penguar miratimin e ligjeve e iniciativave që do përmirësonin ndjeshëm jetën e komunitetit dhe respektimin e të drejtave të tyre.

Pjesëmarrja e të gjithëve ne në këto zgjedhje, është thelbësore për advokimin e të drejtave të të gjithë komuniteteve në të ardhmen, duke ndikuar në formimin e një parlamenti sa më përfaqësues e të hapur ndaj ndryshimit.