Fundjavën e shkuar rajoni i Korçës është goditur nga mbi 70 tërmete të njëpasnjëshme, të cilat kanë shkaktuar dëme të shumta materiale, duke shkatërruar disa dhjetëra shtëpi e duke bërë të pabanueshme shumë të tjera.
Dy netët e fundit, shumë familje të fshatit Floq janë evakuuar dhe po kalojnë mbrëmjen në tenda dhe kampe strehimi të ngritura nga prefektura dhe forcat e ushtrisë. Por ndërsa ushtria ka shpërndarë ushqime, çadra e shtretër për t’ju ardhur në ndihmë banorëve që iu janë dëmtuar banesat, në Floq duket se ka ende probleme.
Mbrëmjen e djeshme, në kampet e strehimit në zonën e Floqit ka pasur tensione e debate mes banorëve dhe prefektit të Korçës, raporton Balkanweb. Ndërsa ky i fundit ka shkuar t’i takojë, ata i janë hakërryer për situatën ku ndodhen.
Banorët thonë se nuk janë furnizuar as me ushqime dhe as me shtretër. Mësohet se aktualisht në çadra po i kalojnë ditët më shumë se 200 persona. Por sipas banorëve, është e paparanueshme që në një çadër të flenë më shumë se 25 banorë.
Lëkundjet vazhdojnë
Lëkundje janë ndjerë dhe gjatë mbrëmjes së djeshme dhe sot në mëngjes, me magnitudë 2.9 dhe 3.6 të shkallës Rihter.
Gjatë natës janë ndjerë disa lëkundje me magnitudë 2.1 dhe 2.4 të shkallës Rihter. Ende nuk dihet nëse lëkundjet janë shoqëruar me dëme të tjera materiale.
Të paktën 184 banesa rezultojnë të dëmtuara nga lëkundjet e mëparshme, 60% e të cilave rezultojnë të pabanueshme.
