Njihuni me Aleks Seitaj, një “drag-queen” shqiptar dhe i mirënjohur për publikun nëpërmjet personazhit artistik “Vezire”.
Në këtë video Aleks flet për mungesën e kulturës “drag” në një vend si Shqipëria si dhe eksperiencën e të performuarit si “Vezirja”, një personazh që sfidon heteronormativitetin.
/k.m/
Në shumicën e shteteve në botë, hendeku i pagave gjinore mbetet i pashpjegueshëm, deklaron Organizata Botërore e Punës (ILO) në një raport të fundit. Për Shqipërinë raporti thekson se, sipas orëve të punës, hendeku gjinor i pagave është 32 % (sipas koeficientit GINI).
Deri më tani raporti ka përshkruar evolucionin e pagave mesatare dhe se si mund të lidhet me ndryshimin e produktivitetit të punës. Megjithatë, siç është vërejtur në edicionet e mëparshme të Raportit të pagave globale (ILO, 2014 dhe 2016), pagat mesatare aktuale, ose trendet në pagat mesatare, nuk na informojnë për nivelet e pabarazisë në paga.
Sipas grafikut më poshtë, tregohet pabarazia në paga, siç përfaqësohet nga koeficienti Gini, duke përdorur të dhënat e anketës mbi pagat nga 64 shtete të cilat së bashku reflektojnë shpërndarjen e pagave nga 75 për qind e punonjësve të pagave në botë.
Shifra ilustron pabarazinë në pagë, duke i krahasuar vendet me të tjerët në një nivel të ngjashëm të zhvillimit ekonomik. Koeficienti Gini përmbledh shpërndarjen relative të pagave në popullsi, me vlera më të ulëta (afër zeros) duke treguar nivele më të ulëta të pabarazisë dhe vlera më të larta (afër 100) duke treguar nivele më të larta të pabarazisë në paga.
Grafiku tregon që pabarazia e pagave ndryshon dukshëm midis dhe brenda katër grupeve të vendeve. Vendet me nivelet më të ulëta të pabarazisë në paga gjenden në grupin me të ardhura të larta, ndërsa vendet me nivelet më të larta të pabarazisë në paga gjenden në grupet me të ardhura të ulëta dhe me të ardhura mesatare.
Rritja e pagave globale në vitin 2017 ishte më e ulët që nga viti 2008, duke mbetur shumë më poshtë niveleve të arritura përpara krizës financiare globale. Rritja e pagave globale në terma realë (që është, përshtatur për çmimin inflacionin) ka rënë nga 2.4 për qind në 2016 në vetëm 1.8 për qind në vitin 2017. Nëse përjashtojmë Kinën, me popullsinë më të madhe, rritja globale e pagave në terma realë ra nga 1.8 për qind në 2016, në 1.1 për qind në vitin 2017.
Raporti i ILO 2018/19 analizon hendekun gjinor të pagave dhe fokusohet në dy sfida kryesore: si të gjejnë mjetet më të dobishme për matjen dhe si të ndahen paga gjinore në mënyrë që të informojnë më së miri politikë-bërësit dhe partnerët socialë për faktorët që janë në themel të saj.
Raporti përfshin gjithashtu një rishikim të çështjeve kryesore të politikave, lidhur me pagat dhe zvogëlimin e boshllëqeve të pagave gjinore në rrethana të ndryshme kombëtare.
Ndërsa sipas të dhënave të fundit të INSTAT, hendeku gjinor në paga është 10,5 %, çka nënkupton se në total, femrat në Shqipëri paguhen 10.5% më pak sesa burrat. Në vitin 2016 diferenca në paga mes meshkujve dhe femrave ishte më e ulët, në 6.3%. /k.j
Burimi: Monitor
Më shumë se 60.000 persona janë vrarë në Jemen në dy vitet e fundit, sipas përllogaritjeve të fundit, një shifër kjo 6 herë më e lartë se sa parashikimet.
Sipas përllogaritjeve të realizuara nga OKB, numri i viktimave arrinte shifrën 60.223, sipas të dhënave të siguruara prej grupit të pavarur kërkimor “Armed Conflit Location& Event Data Project” (ACLED). Llogaritja e numrit të viktimave në Jemen, tashmë në vitin e 4 të gjendjes së konfliktit, është e komplikuar për shkak të mungesës së aksesit për të hyrë në këtë vend.
Të dhënat e siguruara nga ACLED, që bazohet mbi të dhëna të agreguara nga burime me kod burimi të hapur si dhe nga burime lokale të lajmeve, nuk përfshin numrin e vdekjeve të shkaktuara nga uria dhe varfëria. Shoqata bamirëse “Save the Children” u shpreh se është përllogaritur se rreth 85.000 persona mund të kenë vdekur prej urisë që prej vitit 2016 në Jemen.
“Këto shifra fatale janë vetëm një përllogaritje me përafërsi të tregjedisë dhe terrorit që mbizotëron në Jemen prej vitesh” shprehet Raleigh, drejtoreshë ekzekutive pranë ACLED.
Bilanci i vdekshmërisë është rritur nga viti në vit dhe shpjegohet që një nga arsyet për këtë rritje është shkaktuar nga ndërhyrja e Arabisë Saudite në luftë. Qeveria e Jemenit, e cila njihet ndërkombëtarisht, ndodhet momentalisht në azil./k.m/
Burimi: The Telegraph
Në verën e vitit 1998, Asambleja e Përgjithshme e Lobit Evropian të Grave nisi një lëvizje historike, ku u pohua për herë të parë se “prostitucioni dhe trafikimi i grave përbëjnë një shkelje thelbësore të të drejtave të njeriut të grave”.
Që nga ajo kohë, Lobi Evropian i Grave ka vazhduar të forcojë besimin se asnjë grua nuk duhet të ballafaqohet me një mungesë të tillë zgjedhjeje financiare, aq sa të rrezikojë sigurinë, mirëqenien dhe shëndetin afatgjatë për mbijetesë.
Për të shënuar 20 vjetorin e një qëndrimi abolicionist mbi prostitucionin, Lobi vazhdon të theksojë veprimet e lëvizjes në nivel ndërkombëtar dhe kombëtar, duke nisur dhe një fushatë online me emrin #20yrsEndDemand në internet, ku të tjerë përkrahës mund të bashkohen me kauzën.
Ky vit shënon 20 vjetorin e fushatës nisur nga Lobi i Grave Europiane: “Së bashku për një Europë pa prostitucion” dhe përfaqëson 20 vite luftë të vazhdueshme për të arritur një pozitë sociale kundër kësaj forme serioze të dhunës kundër gruas: prostitucioni.
Prostitucioni është një fenomen që në jo pak raste raste mund të ushtrohet nga gratë në vullnet të lirë, por shumica e rasteve flet për një mungesë të të drejtave më themelore ekonomike të grave, që sjell nënshtrimim e tyre ndaj formave të ndryshme të dhunës dhe që detyron ato tu nënshtrohen abuzimit seksual.
Nga një analizë feministe dhe e mbrojtjes së të drejtave të njeriut, nuk duhet të lejojmë një sistem të bazuar në përdorimin seksual dhe abuzimin e grave më të pambrojtura në planet nga meshkujt në Perëndim, ose nga meshkujt perëndimorë në vende të tjera të destinacionit turistik, ku pabarazitë sociale ushqejnë dhe fenomenin e prostitucionit.
Fushata evropiane padyshim ka ndihmuar Parlamentin Evropian që të miratojë një rezolutë më 26 shkurt 2014, mbi shfrytëzimin seksual dhe prostitucionin dhe ndikimin e saj në barazinë gjinore, e cila përcakton së pari se prostitucioni është një fenomen gjinor me një dimension global që prek rreth 40 -42 milionë njerëz në mbarë botën. Shumica dërrmuese e njerëzve në prostitucion janë gra dhe vajza dhe pothuajse të gjithë përdoruesit janë meshkuj. Prandaj, ajo shpreh një problem të pabarazisë gjinore dhe seksuale.
Është jashtëzakonisht e rëndësishme të kërkohen veprime nga ana e qeverive të Bashkimit Evropian në përputhje me parimet themelore të Bashkimit Evropian dhe në veçanti me parimin e barazisë midis grave dhe burrave./k.j
Burimi:WomenLobby
Tematika e drejtësisë tranzicionale dhe rëndësia e saj sa vjen e bëhet më prezente në vendin tonë. Shpeshherë kur dëgjohet të flitet për drejtësinë tranizicionale, mendimi i parë që të kalon nëpër mend është hapja e dosjeve të ish-Sigurimit të Shtetit, rehabilitimi i viktimave të persekutimit komunist, dëmshpërblimi i tyre etj.
Por një komponent, mjaft i rëndësishëm në fakt, që lëmë jashtë kësaj tematike janë të rinjtë dhe angazhimi i tyre në procesin e dialogimit me të kaluarën. Fatkeqësisht në tekstet shkollore periudha e komunizmit në Shqipëri vijon të jetë plot me dritë-hije dhe pa një trajtim të thelluar mbi persekutimin komunist.
Për t’i dhënë një zgjidhje çështjeve të lartpërmendura, një aktivitet interesant u zhvillua javën e kaluar në formatin e punëtorisë me emrin “Historia e Komunizmit dhe ish-Sigurimit të Shtetit” në Wikipedian shqip. Ky aktivitet erdhi si rezultat i bashkëpunimit të frytshëm midis AIDSSH (Autoritetit për Informimin mbi Dokumentet e ish-Sigurimit të Shtetit) dhe komunitetit “Wikimedians of Albanian Language User Group”.
Të dy komponentë të rëndësishëm, AIDSSH si një komponent kyç në Shqipëri që hedh dritë mbi dosjet e ish-Sigurimit dhe komuniteti i Wikimedianëve shqiptarë që iu mësojnë të rinjve dijet teknike bazë për të kontribuar në Wikipedian shqip. Interesi i të rinjve për këtë periudhë historike është i madh dhe përmes angazhimit në Wikipedia këta të rinj mund të njihen më mirë me atë periudhë duke kontribuar dhe zgjeruar informacionin për atë periudhë. Dhe mesa duket ia dolën!
Aktiviteti ishte konceptuar i ndarë në dy pjesë: pjesa e parë ishte teorike, e dedikuar për njohjen me konceptin e Wikipedias dhe strukturat horizontale që e udhëheqin atë. Ky aktivitet u përshëndet nga kryetarja e Autoritetit, zj. Gentiana Sula e cila theksoi gjatë fjalës hyrëse rëndësinë e të rinjve në dialogun social. Pjesa e dytë ishte praktike dhe pjesëmarrësit me dijet teknike bazë të absorbuara ia nisën punës me krijimin e artikujve.
Aktiviteti u përmbyll me përmirësimin e mbi 15 artikujve, krijimit të 3 artikujve të rinj bazuar mbi burime informacioni të dixhitalizuara. Ky aktivitet u përmbyll me shpërndarjen e certifikatave për pjesëmarrësit.
/k.m/
Me mijëra protestues u mblodhën sërish të shtunën e kaluar në kryeqytetin serb për të dënuar veprimet e qeverisë, ato të Presidentit Vuçiç si dhe transmetuesve publik televiziv për mungesën e mbulimit mediatik sa iu përket protestave të fundit në Beograd.
Këta protestues kundërshtojnë dhunën politike në vend dhe mungesën e lirisë mediatike. Pasi u mblodhën në qendër të Beogradit, një radhë kilometrike me protestues që u bashkuan në protestë mbushën rrugët e Beogradit, duke kaluar pranë parlamentit serb nën parrullën “Presidenti serb është hajdut”.
Protestuesit kaluan pranë godinës së transmetuesve publik televiziv, duke iu bërë apel për një mbulim mediatik më profesional të protestave, duke kërkuar në këtë mënyrë më shumë zëra opozitarë në median serbe si dhe për t’i dhënë fund dhunës politike në Serbi.
Dy ditë më parë organizuesit e protestës publikuan një deklaratë për shtyp në të cilin i vinin një datë mediave në Serbi që të plotësonin kërkesën e tyre për të mbuluar zërat opozitarë nga protestat, duke i dhënë hapësirë përfaqësuesve nga protestat.
https://www.youtube.com/watch?v=2-u11uPihmk
“Ne duam nga RTS që në çdo buletin lajmesh ti dedikojë hapësirë zërave opozitarë për të shprehur qëndrimet e veta si dhe qëndrimet e alternativave të tjera jo-qeveritare. Po rikujtojmë se ky është një detyrim ligjor që transmetuesit publikë kanë” thuhet në deklaratën për shtyp.
Kjo është protesta e tretë anti-qeveritare e organizuar këtë muaj, pas marshimit të mijërave protestuesve në Beograd, konkretisht në 8 dhe 15 dhjetor. E gjitha kjo nisi pasi një politikan i krahut opozitar u dhunua fizikisht./k.m/
Burimi: Balkan Insight
Një kërkim i realizuar nga një organizatë për të drejtat e njeriut, pranë Amnesty International arriti në konkluzionin se poitikanet dhe gazetaret gra abuzohen çdo 30 sekonda në platformat sociale.
Vetëm gjatë vitit të kaluar më shumë se 1 milionë tweet-e abuzive iu drejtuan gazetareve të mirënjohura dhe politikaneve gra në Twitter. Ky është studimi më i gjerë i realizuar ndonjëherë për abuzimin online me bazë gjinore, ku gratë me ngjyrë janë më vulnerabël ndaj dhunës online.
Fatmirësisht një studim i tillë i realizuar prej Amnesty International do të nxisi masa parandaluese si dhe do të përpilohen strategji për mënyrën se si trajtojmë dhunën online, në mënyrë që të mbrojmë gratë në sferën dixhitale.
Ky studim u realizua nga organizata ndërkombëtare “Amnesty International” dhe “Element AI” që analizuan rreth 300.000 tweet-e nga 2017. Kërkuesit studiuan me kujdes llojet e abuzimeve me bazë racore, seksualitetin dhe identitetin gjinor. Nga leximi i të dhënave doli në pah se gratë me ngjyrë janë dyfish më të predispozuara të jenë viktima të gjuhës së urrejtjes online.
Një prej grave më të sulmuara është Diane Abbott, e cila u sulmua më shumë se çdo grua britanike në 2017. Ajo është target i rreth 30.000 postimeve në Twitter me gjuhë urrejtje, brenda një viti. “Tanimë kemi të dhëna ku mund të bazohemi për të treguar gjendjen alarmante në Twitter, një platformë sociale që është kthyer në një vend ku misogjinia, racizmi dhe homofobia lulëzojnë pa kontroll” u shpreh njëri prej kërkuesve të studimit./k.m/
Burimi: NewsMavens
Një zjarr ka përfshirë tregun industrial të Laçit mëngjesin e sotëm. Si pasojë e flakëve nuk ka persona të lënduar, por vetëm dëme të shumta materiale.
Tregu industrial është rreth 800 metra dhe në të shiten veshmbathje të ndryshme. Mësohet se në momentin që ka rënë zjarri nuk ka pasur energji elektrike.
Policia dyshon se zjarri ka qenë i qëllimshëm, ndërsa tregtarët shprehen se ka pasur prej kohësh konflikt mes pronarit të tregut industrial si dhe pronarëve të tokës ku është ndërtuar tregu.
Gjithashtu tregtarët kanë gjetur edhe një bidon benzinë të cilin policia e ka sekuestruar si provë materiale. Në vendngjarje ka mbërritur policia dhe shërbimi zjarrfikës të cilët po punojnë për neutralizimin e flakëve./k.j
Burimi: Balkanweb
Pas Fakultetit të Shkencave Sociale, 51 pedagogë të Fakultetit të Filologjisë kanë nënshkruar një peticion për shfuqëzimin e Ligjit të Arsimit të Lartë. Në peticion, pedagogët theksojnë se Ligji i Arsmimit të Lartë, i cili është aktualisht në fuqi shkel thellësisht të drejtat e studentëve.
Si kërkesë e dytë, në peticion shprehet nevoja e hartimit të një ligji të ri me parime të transparencës dhe që i mundëson të diplomuarve integrimin në tregun e punës.
Deklarata e plotë në vijim:
Deklaratë e pedagogëve të Fakultetit të Historisë dhe të Filologjisë, Universiteti i Tiranës.
Në vijim të qëndrimit mbështetës ndaj protestës së studentëve dhe kërkesave të tyre legjitime, ne, pedagogët e Fakultetit të Historisë dhe të Filologjisë i falënderojmë ata për guximin dhe qëndresën qytetare.
Të ndërgjegjshëm që problemet e sotme janë pasojë e Ligjit për Arsimin e Lartë dhe Kërkimin Shkencor në Institucionet e Arsimit të Lartë në Republikën e Shqipërisë, Nr.80/2015, siç e kemi artikuluar që prej katër vitesh, kërkojmë:
Vijojnë emrat:
Artan Fuga, Mark Marku, Romeo Hanxhari, Lili Sula, Agron Gjekmarkaj, Erka Caro, Sokol Axhemi, Sabri Laci, Ermal Baze, Mimoza Gjokutaj, Gentiana Kera, Genta Skuraj, Eno Popi, Jonila Godole, Ramadan Cipuri, Edlira Mecaj, Loreta Axhami, Dhurata Shehri, Ervin Goci, Albana Kosovrasti, Ornela Hasrama, Rrapo Zguri, Arben Belba, Vjollca Osja, Linda Meniku, Edlira Tonuzi, Eljan Doce, Viola Isufaj, Sonila Papathimiu, Sonila Xhafa, Enriketa Papa, Raimonda Nelku, Zylyftar Bregu, Elsa Skenderi, Ymer Ciraku, Edlira Kola, Merita Karaguni, Andri Hoxha, Enkela Begu, Lindita Xhanari, Migena Leskoviku, Juliana Marko, Meli Bregu, Andi Pinari, Holta Shupo, Albana Deda, Flora Koleci, Alban Tartari, Dhimitër Doko, Dhimitri Bello, Marin Haxhimihali. /k.j
Një ditë pasi faqja Historia Ime informoi publikun se si Bashkia e Tiranës do të vendosë gjoba edhe për fëmijët romë që fshijnë xhamat e makinave, kryetari i Bashkisë së Tiranës, z. Erion Veliaj na e ka hequr mundësinë që të kemi akses në profilin publik të tij në Twitter.
Bllokimi i HI në Twitter nuk ka asnjë lloj rëndësie e nuk përbën interes publik.
Por një veprim i tillë, sado i vogël dhe i parëndësishëm të duket, nuk është vetëm një veprim inatçor dhe i nxituar. Ky në fakt është një veprim që tregon mendësinë e z.Veliaj ndaj fjalës së lirë dhe si i tillë, përbën lajm e sigurisht, edhe interes publik.
HI është një faqe e themeluar nga organizata “Pro LGBT” në vitin 2012 për të sjellë në hapësirën publike histori dhe çështje nga grupe të ndryshme të margjinalizuara që nuk zenë zakonisht vëmendjen e duhur në median tradicionale. Një prej këtyre grupeve është edhe komuniteti rom dhe egjiptian.
Ne kemi qenë ndër të vetmit që i kemi ndjekur historitë e tyre, shpesh në konflikt të hapur me kryebashkiakun Veliaj dhe asnjëherë nuk e kemi ndalur betejën për drejtësi sociale.
Faqja jonë është modeste dhe e vogël edhe pse është ndër më të vjetrat mediume online në shqip. E megjithatë ajo që na bën të mëdhenj përpara kryebashkiakut, i cili abuzon me median, është fakti që nuk kemi asnjë interes as financiar e as profesional me të. Për këtë arsye censura e tij ndaj nesh është aq në disproporcion me staturën që një shërbëtor i zgjedhur i qytetit duhet të ketë, saqë zoti Veliaj nuk mund të na bëjë dot asgjë më shumë se të na bllokojë në Twitter.
Çfarë është me interes për tu shënuar në këtë episod është fakti që kryebashkiaku e konsideron hapësirën publike të komunikimit dhë të llogaridhënies për të cilën ai ka detyrimin ligjor, si një hapësirë private.
Jo vetëm kaq. Ai, pavarësisht se kërkon të duket si besimtar e si një njeri që ia ka dhënë jetën Jezusit, në fakt sillet si njeri i vogël që mendon në çdo moment si të hakmerret edhe në episode të tilla kaq të pabarabarta, që të ngjajnë si beteja e Davidit me Goliathin.
Kujtoni, për shembull, si u soll ai me gazetaren e një televizioni e cila kishte përgatitur një reportazh ku raportohej roli i Veliajt në largimin nga jeta e të riut Ardit Gjoklaj dhe për përpjekjen për ta fshehur atë ndodhi. Kujtoni se si u soll me regjisorin dhe autorin e një tjetër programi televiziv që do të transmetonte historinë e Arditit. Kaq mjafton për të kuptuar se kjo lloj sjellje e Z. Veliaj karshi medias që nuk pranon kompromise , mbetet e egër dhe censuruese.
Redaksia e “Historia Ime”
Së fundmi Bashkia e Tiranës ka ardhur me projekt-vendimin kontrovers “Për Kontrollin e Territorit dhe përcaktimin e disa kundravajtjeve administrative dhe sanksionin që vendoset për to në Bashkinë e Tiranës.” Në disa prej neneve të projektligjit, në pamje të parë me qëllim përmirësimin e jetesës urbane në qytet, është konstatuar nga organizata të shoqërisë civile se amendamentet e propozuara nga Këshilli Bashkiak shkelin standartet ndërkombëtare dhe të drejtat e njeriut.
Ky projektligj sjell listimin e një sërë veprimesh që konsiderohen si shkelje administrative të ndara në 7 grupime me kundravajtje ligjore. Disa prej këtyre veprimeve të grupuara në këto kategori janë: zënia e hapësirës publike nga ambulantët; braktisja e automjeteve në rrugë; djegia e mbeturinave; dalja zhveshur, të bërtiturit, dehja në mjedise të hapura etj.
Në mbledhjen e ardhshme Këshilli Bashkiak pritet të miratojë vendimin për Kontrollin e Territorit dhe përcaktimin e kundravajtjeve administrative së bashku me sanksionet që vendosen për secilën kundravajtje. Sanksionet e parashikuara konsistojnë në paralajmërime dhe gjoba që variojnë nga 1.000 lekë deri në 20 mijë lekë.
Nisur nga rrethanat, një sërë organizatash nga shoqëria civile kanë ardhur me një deklaratë të përbashkët për median ku i drejtohen Këshillit Bashkiak të Tiranës për mosmiratimin e disa prej pikave të projektligjit në përcaktimin e kundravajtjeve administrative, ndër të cilat sjell kriminalizimin e shitësve ambulantë në rrugë e trotuare.
Kjo deklaratë mbështetet nga organizatat: Qendra T’Reja, Lëvizja Rinore Egjiptiane Rome, Civil
Rights Defenders, Komiteti Shqiptar i Helsinkit, Fondacioni Shqiptar për të Drejtat e Personave
me Aftësi të Kufizuara, Qendra për Nisma Ligjore Qytetare, Qendra për Arsim Cilësor,
Shërbimi Ligjor Falas Tirane – TLAS, Res Publica, Rromano Kham, Rrjeti i Fuqizimit të Gruas
në Shqipëri-AWEN.
Historia Ime shpall fituesen e edicionit të tetë të Konkursit “Fotografo për të drejtat e tua”. Ivana Dervishi është fituese e konkursit që ka për qëllim të mbështesë aktivizmin përmes gazetarisë qytetare.
Shtrati i lumit të Tiranës në fshatrat periferikë të Tiranës, pranë aeroportit “Nënë Tereza” është mbushur me qese plastike dhe mbetje të tjera urbane, duke u përhapur në një shkallë aq të madhe sa ka filluar të ngjitet dhe mbi pemë.
Mungesa e prioritetit qeveritar për të drejtat mjedisore në Shqipëri prej disa dekadash i ka bërë ato të paarritshme për shtetasit shqiptarë, duke shkaktuar alarm te mjedisorët për vdekjet e lidhura me ndotjen.
Në fillim të vitit 2018, mbetjet e patrajtuara shqiptare tërhoqën vëmendje ndërkombëtare kur u shpëlanë në brigjet e Kroacisë, pas grumbullimit nga lumenjtë dhe derdhjes në Adriatik. Si një shtet kandidat për t’u anëtarësuar në Bashkimin Europian, Shqipëria ka marrë disa paralajmërime nga Këshilli i Europës për të gjetur një menaxhim të qëndrueshëm dhe eko-miqësor për mbetjet.
Vitet e fundit kanë parë gjithashtu një rritje të protestave të aktivistëve dhe mjedisorëve për mbrojtje të shtuar të natyrës.
Kriteri kryesor për përzgjedhjen e fituesit është përcjellja e një mesazhi apo denoncimi i një problemi social përmes fotografisë. Ndër kriteret e tjera të vlerësimit janë cilësia dhe origjinaliteti i fotografisë, kompozimi dhe përputhja me çështjet prioritare të thirrjes.
Sot do të jetë dita e fundit e protestës së studentëve për këtë vit, pasi ata do të rikthehen sërish në janar.
Studentët e Akademisë së Arteve dhe disa studentë të tjerë kanë vendosur që të protestojnë para parlamentit, aty ku edhe sot do të mbahet një seancë.
Protestat e studentëve do të vazhdojnë sërish vitin tjetër, pasi universitetet sot mbyllin dyert për shkak të pushimeve për festat e fundvitit.
Prej më shumë se dy javë, studentët protestojnë pasi kërkojnë plotësimin e 8 kërkesave./kj
Burimi: oranews
Javët e fundit po rezultojnë javë tepër intensive, ku rezistencat qytetare dhe protestat po na shoqërojnë në përditshmërinë tonë.
Paralelisht me protestën e studentëve, që pothuajse përditë ndërron intinerar, edhe banorët e Unazës së Re po protesojnë pandërprerje për kauzën e tyre. Përditë, ato mblidhen pasditeve për të kërkuar anullimin e planit për zgjerimin e rrugës, punimet për të cilën u pezulluan pas skandalit të falsifikimit të dokumentave prej kompanisë që kishte fituar tenderin.
Ndërsa qëndresa e tyre po hyn në muajin e dytë, banorët e Unazës së Re kërkojnë jo vetëm anulim të projektit të “Unazës së Madhe” por edhe burgosjen e ministrit të Energjisë dhe Infrastrukturës, Damian Gjiknurit dhe kreut të ARRSH, Afrim Qendro.
Ditën e djeshme ato protestuan sërish duke kërkuar plotësimin e kërkesave të tyre dhe shpronësim të drejtë, ashtu si dhe u është premtuar.
“Çfarë ka bërë ARRSH, Damian Gjiknuri së bashku me Afrim Qendron dhe Edi Rama, në Unazën e Re për banesat që janë bërë me hipotekë? Bizneset i shpronësojnë me 200 mijë lekë të vjetra. Çfarë bëjnë këta?
Na merr 200 mijë lek, dil nga shtëpia dhe ta blej unë 3 mijë euro. Kjo gjë, kur themi për oligarkinë, flasim për konceptin e qeverisjes së të pasurve dhe injorantëve, një grupi të mbyllur.
Të gjithë kemi qenë në emigracion por se kemi bërë vilën si në Surrel, prandaj themi që ka krim të organizuar”, tha avokati, Artan Manushaqe.
Autoriteti Rrugor ndërkohë, pas zbulimit të skandalit, ka pezulluar punimet dhe ka rihapur garën për tender për zgjerimin e rrugës. Punimet e nisura janë lënë përgjys, duke shkaktuar mjaft kaos në qarkullimin e përditshëm rrugor, ndërsa ky veprim duket se s’ka ndaluar përpjekjet e banorëve për anullimin e projektit./k.j
Disa anëtarë nga komunitetit rom, që janë bërë pjesë e një rasti flagrant diskriminimi institucional, ka denoncuar pranë Komisionerit për Mbrojtjen nga Diskriminimi bashkinë vendore të Krujës. Ky denoncim ka ardhur si pasojë e diskriminimit të shfaqur nga Bashkia e Krujës ndaj familjeve rome në zonën që njihet si lagjia “Kastriot”. Diskriminimi është bërë mbi bazën e etnisë dhe statusit ekonomiko-social, duke iu refuzuar të drejtën e furnzimit me ujë të pijshëm familjeve rome në këtë zonë.
Rasti është ndërmjetësuar përmes Komitetit Shqiptar të Helsinkit (KSHH) si dhe prej Qendrës Europiane për të Drejtat e Romëve (ERRC) të cilët mundësuan dhe provat për ti dërguar pranë Komisionerit. Tashmë Bashkia e Krujës ka marrë urdhërin nga Komisioneri për të marrë masa për përmirësimin e situatës ose përndryshe ky institucion do të ballafaqohet me gjobitje.
Sa i përket rastit në fjalë, kompania e ujësjellës-kanalizimeve përgjegjëse, për furnizimin me ujë në bashki, tregoi se linjat e furnizimit me ujë arrijnë deri tek komuniteti rom, por nuk është shpreur interes nga askush për pikat e lidhjes.
“Ky vendim është një hap i rëndësishëm drejt njohjes dhe kapërcimit të diskriminimit institucional me të cilin romët përballen në Shqipëri. Do të monitorojmë veprimet e bashkisë me kujdes gjatë 30 ditëve të ardhshme për t’u siguruar që do të ndërmarrin masa urgjente për të siguruar ujë të pastër.” është shprehur Rovena Vuksani nga KSHH./k.m/
Burimi: Komiteti Shqiptar i Helsinkit
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.
