Në  kuadër të  nismës së  historiaime.al për të denoncuar seksizmin në media

Një studente shqiptare e cila për pak humbi jetën në një histori personale të dhimbshme, tani duhet të përballet me një tjetër tentativë për ta vrarë!

Prej dy ditësh ka një shfrenim absurd dhe një tentativë të jashtëzakonshme të medies shqiptare, sidomos të gazetave, për të shitur kopjet e tyre duke nxjerrë në faqet e para foton e vajzës simpatike dhe duke rrëmuar për detaje që të kujtojnë një mani seksizmi thuajse perverse të disa gazetarëve të kronikës apo të atyre që e kultivojnë këtë lloj gazetarie.

Panorama dhe Shekulli, teorikisht dy ndër gazetat më të medha në vend kishin botuar fotografitë e vajzës dhe e kishin konsideruar për të dytën herë historinë e saj dhe të një burri që vrau veten pasi shtiu me armë ndaj vajzës, si kryeartikull.

Madje Shekulli kishte dhe një absurditet tjetër: Botonte foton e vajzës bashkë me një mashkull që ata e identifikonin si të fejuarin e saj. Por këtij të fundit i kishin mbuluar fytyrën, ndërsa vajzës vetë jo!

Ne kemi disa pyetje:

A po punon këto dite institucioni i Komisioneres për Mbrojtjen e të Dhënave Personale, apo është me pushime?

A mund të ketë ndonjëherë një debat gjithpërfshirës në Shqipëri për keqpërdorimin e të dhënave personale të qytetarëve?

Kur do edukohen gazetarët e kronikës por edhe shefat e tyre që nuk vidhen më në vitin 2013 foto nga Facebooku për tu perdorur në faqet e para të gazetave?

Cila ka më shumë rëndësi: mania për të shuar kuriozitete perverse të një lexuesi që me shumë gjasa është më i edukuar se gazetat (ky kuriozitet me shumë deficencë e redaksive, shumë shpesh shitet si interes publik), apo jeta dhe e ardhmja e një vajze që i shpetoi për mrekulli vdekjes?

Dhe kemi një pyetje të fundit: Si ka mundësi që ngjarje edhe më të dhimbshme se kjo nuk pasqyrohen po si kjo histori nëpër gazeta? A do të kishte më pak interes, fjala vjen, në rast se vajza nuk do të kishte hiret natyrale qe ka si një vajzë e bukur dhe e re?!

/REDAKSIONALE/ 

 

 

---

---

News24 sjell historinë e dhimbshme të 20-vjeçarit jetim, i cili prej muajsh endet rrugëve të Tiranës pa ngrënë dhe pa pasur se ku të flejë. Eshtë 20 vjeç, jetim dhe pa mbështetje. Ka kaluar një kalvar të gjatë vuajtjesh, është munduar tw shkollohet, por ka mundur të mbarojë vetëm klasën e nëntë. Babai i ka vdekur prej vitesh, i vëllai me probleme gjithashtu endet rrugëve të Tiranës pa strehim, ndërsa nëna me probleme mendore ndodhet në qytetin e Pukës.

Fillimisht ka qenë te shtëpia “Zyber Hallulli”, më pas është zhvendosur në Shkodër, i ndihmuar nga Kisha Katolike. Në Tiranë është strehuar tek një konvikt për jetimët e rritur, por atje kishte një krevat dhe jetonte në korridor. Ai apelon për ndihmë, kërkon një strehë ku të fusë kokën, një punë dhe të vijojë studimet e lëna përgjysmë.

“Kam fjetur nëpër qendra interneti, rrugëve. Gjatë verës nuk kam pasur problem për fjetjen, por ushqimi është i vështirë për ta siguruar. Kam lypur”- shprehet ai.

Gentjan Brija thotë se donte një strehim që të bashkonte edhe familjen e tij të shpërndarë dhe të pastrehë.

“Do kisha nevojë për një strehim, që të merrja nënën e vëllain dhe të bashkoheshim të tre. Nëna ka një problem psikologjik.”- tregon ai.

Ndërsa dy shoqata që merren me këtë shtresë theksojnë nevojën që të zbatohet ligji për këtë shtresë si për strehim ashtu dhe për punësim.

Ndërsa drejtori ekzekutiv i shoqatës “E ardhmja Jonë”, Alfred Muarremi thotë se do t’i sigurojë patjetër shkollim Gentianit, qoftë edhe me fondet e tij.

“Do t’ja siguroj shkollën edhe sikur ta paguaj vetë nga xhepi im. Por shteti duhet të verë dorë, për strehim, ku janë institucionet, pse më erdhi mua në zyrë. Ky duhet të ishte ndihmuar që në lindje, që kur i ka vdekur i ati”- shprehet Muharremi.

Gentiani apelon për ndihmë të gjithë ata persona që kanë mundësi për ta bërë sado pak normale jetën e tij, të përvuajtur në vite. Numër kontakti për ndihmë 0682003339.

---

---