Pas shtimit të rasteve të reja të infektimeve me koronavirusin e ri, autoritetet shtetërore në Beograd rikthyen orën policore dhe njoftuan izolimin e kryeqytetit nga e premtja përgjatë 72 orëve në fundjavë.
Vendimi i qeverisë, i deklaruar nga vetë Presidenti serb Aleksandër Vucic, shkaktoi protesta në Beograd, ku qindra protestues rrethuan Parlamentin e Serbisë dhe madje u përpoqën dhe të hynë brenda tij.
Pamjet që ndoqën këtë protestë ishin të rënda, me forcat e policisë që shpërndajnë qytetarët me gaz lotsjellës, policë duke dhunuar protestues e duke i lënë pa ndjenja në mes të rrugës, disa herë dhe qytetarë të thjeshtë që nuk po merrnin pjesë në protestë dhe mjete të ushtrisë në rrugët e kryeqytetit.
Sipas ekspertëve, rritja e numrit të infektimeve në Serbi lidhet ngushtë me fushatën zgjedhore të muajit të shkuar dhe mbajtjejn e zgjedhjeve të përgjithshme parlamentare më 21 qershor, të cilat u kontestuan dhe u bojkotuan nga forcat opozitare, në përpjekje për të sjellë vëmendjen te përpjekjet e presidentit Vucic për të kapur të gjitha pushtetet në Serbi duke përfituar dhe nga pandemia e Covid-19.
Pasi televizioni rajonal N1 publikoi video ku dukeshin efektivë të policisë që sulmonin disa persona që nuk po merrnin pjesë në protestë, Nisma Rinore për të Drejtat e Njeriut, një OJQ, i bëri thirrje Ministrisë së Brendshme dhe Avokatit të Popullit të Mërkurën të fillojnë hetimet për përdorimin e tepërt të dhunës nga policia.
Të mërkurën, Komisioneri i të Drejtave të Njeriut i Këshillit të Evropës, Dunja Mijatovic, tha se shpërndarja e dhunshme e demonstruesve nga policia në Beograd ngriti shqetësime serioze për të drejtat e njeriut.
Midis protestuesve ishin edhe mbështetës të majtë dhe të krahut të djathtë. Një ish anëtar i partisë së krahut të djathtë Dveri dhe një deputet Srdjan Nogo, ishte në mesin e atyre që sulmuan parlamentin.
Gjatë protestave, disa njerëz kënduan këngë për Kosovën, duke e quajtur Presidentin Vucic “tradhtar” dhe duke kërkuar dorëheqjen e tij.
Kryeministrja Ana Brnabic fajësoi politikanët e opozitës për trazirat dhe tha se shteti do të mbrojë rendin juridik, si në çdo vend demokratik.
Aktivistët ngritën shqetësimet dhe për censurë nga mediat kombëtare. Ndërsa televizionet rajonale po mbulonin kronikën, me dhjetëra gazetarë që ishin duke lotuar prej gazit lotsjellës, raportohet se televizionet kombëtare po vijonin programacionin e tyre të filmave.
Shumë prej rasteve të dhunës dhe pamjet e shpërndarjes së protestuesve janë publikuar në rrjete sociale.
Dhuna e pajustifikuar e policisë u dënuan dhe nga CIvil Rights Defenders. Në reagimin e tyre publik, CRD bën thirrje për hetimin e dhunës, duke rikthyer vëmendjen te masat ekstreme të autoriteteve dhe në fillim të pandemisë.
“Kur vala e parë e pandemisë goditi rajonin në muajin Mars, Serbia ishte nën një gjendje të jashtëzakonshme me disa nga masat më të rrepta dhe shmangiet e të drejtave të njeriut në Evropë – duke përfshirë rastet e kufizimit të lëvizjes për pesë ditë pa ndërprerje dhe kufizimin e plotë të lirisë së lëvizjes për personat mbi 65 për 35 ditë të plota.
Megjithatë, në fillim të majit, qeveria hoqi papritmas të gjitha masat dhe njoftoi se koronavirusi ishte mposhtur. Për dy muajt në vijim, qytetarët u kthyen në punë, baret dhe klubet u rihapën, dhe u mbajtën manifestime të mëdha sportive, duke përfshirë turneun tani të famshëm të tenisit Adria Tour dhe një derbi të futbollit me praninë e 25,000 tifozëve. Kjo fazë përkoi me periudhën e fushatës për zgjedhjet parlamentare, të mbajtura në 21 qershor, dhe qeveria është akuzuar gjerësisht për përpjekje për të rivendosur normalitetin, madje duke paraqitur numra të konsiderueshëm më të ulët të rasteve, në mënyrë që zgjedhjet të ecin përpara.
Ne i bëjmë thirrje qeverisë së Serbisë të sigurojë që publiku të informohet për ngjarje të tilla në mënyrë objektive dhe pa paragjykime. Gjatë trazirave të mbrëmshme, as transmetuesi publik dhe as ndonjë kanal tjetër televiziv me frekuencë kombëtare nuk raportuan për zhvillimet.” shkruhet në deklaratën e zyrës së Civil Rights Defenders për Europën.
Pamje të dhunës vijojnë të publikohen, ndërsa protesta pati dhe në Novi Sad.
Mbrëmjen e djeshme, Presidenti deklaroi se komiteti i ekspertëve të vendit, do të rikonsideronte masat për fundjavën, në përpjekje për të qetësuar trazirat në vend.
Burimi i fotos: EPA-EFE/KOCA SULEJMANOVIC
Trending Now
Hipokrizia e 8 Marsit
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.