Franca urdhëroi shpërndarjen e të gjithë stokut të maskave kirurgjikale ditën e djeshme, ndërsa kreu i Organizatës Botërore të Shëndetit (OBSH) tha se grumbullimi, keqpërdorimi dhe mungesa e pajisjeve mbrojtëse po i linte mjekët dhe infermierët “të papajisur” për t’u kujdesur për pacientët e koronavirusit COVID-19.
Presidenti Emmanuel Macron njoftoi se shteti francez po merrte përsipër përdorimin e “të gjitha rezervave dhe prodhimin e maskave mbrojtëse” për t’i shpërndarë ato tek të sëmurët nga koronavirusi dhe kujdestarët e tyre.
Në Marsejë, sipas autoriteteve shëndetësore lokale situata u përkeqësua dhe nga vjedhja e rreth 2,000 maskave kirurgjike nga spitali Conception.
Kutitë u vodhën nga blloku qendror i spitalit publik, i cili është i arritshëm vetëm nga personeli shëndetësor dhe pacientët, thanë zyrtarët për AFP.
Pavarësisht thirrjes për mos-përdorimin e maskave për individët e shëndetshëm dhe pa simptoma gripi, blerja e tyre po vijon me masë në të gjithë vendet, ndërsa Kina ka shumëfishuar prodhimin, duke kapur vlerën e 110 milionë maskave të prodhuara në një ditë.
Disa industri të mëdha në Kinë dhe Japoni, si gjigandi i televizorëve Sharp, njoftuan përshtatjen e fabrikave të tyre dhe linjave të prodhimit për prodhimin e maskave.
Linja e prodhimit e Sharp në Japoni, së shpejti mund të rritet dhe përshtatet për prodhim deri në 500,000 maska në ditë duke ndërprerë një pjesë të prodhimit të saj për televizorë.
Bota ka nevojë përditë rreth 89 milion maska mjekësore, 67 milion doreza ekzaminimi dhe 1.6 milion syze kirurgjikale, tha OBSH.
Tashmë ajo ka dërguar gjysmë milioni pajisje mbrojtëse shtese në dhjetëra vende, por furnizimet po varfërohen me shpejtësi.
Por maskat për fytyrën kanë qenë prej kohësh një pamje e zakonshme në qytetet japoneze, veçanërisht gjatë muajve të dimrit. Paniku që po shoqëron përhapjen e koronavirusit të ri, thjesht po përkeqëson më tej situatën.
Përhapja e Covid-19 ka çuar në kërkesë shumë më të lartë, me shumë dyqane që po mbarojnë rezervat e tyre, së bashku me furnizime të tjera siç është letra higjienike dhe higjenizantët.
“Furnizimet mund të duhen muaj për të dorëzuar, manipulimi i tregut është i përhapur dhe stoqet shpesh shiten te ofertuesi më i lartë.” deklaruan zyrtarët e OBSH për situatën, duke e konsideruar si “një çështje solidariteti” që nuk mund të zgjidhej vetëm nga OBSH, dhe kishte nevojë për bashkëpunimin e prodhuesve, qeverive dhe qytetyarëve.
